നീന്തലില്‍ അഞ്ചു സ്വര്‍ണവുമായി അമേരിക്കയുടെ കെയ്‌ലബ് ഡ്രെസല്‍
ഇതിഹാസ നീന്തല്‍ താരം മൈക്കല്‍ ഫെല്‍പ്‌സിന്റെ പിന്‍ഗാമിയായാണ് 24കാരനായ ഡ്രെസല്‍ അറിയപ്പെടുന്നത്.
ടോക്കിയോ: ഒരു ഒളിംപിക്‌സില്‍ അഞ്ച് സ്വര്‍ണ്ണം നേടിയ ഇതിഹാസ താരങ്ങള്‍ക്കൊപ്പം സ്ഥാനം പിടിച്ച് അമേരിക്കയുടെ നീന്തല്‍ താരം കെയ്‌ലബ് ഡ്രെസല്‍. നേരത്തെ നാല് സ്വര്‍ണ്ണം നേടിയ ഡ്രെസല്‍ ഇന്ന് നടന്ന 4-100 മീറ്റര്‍ പുരുഷ വിഭാഗം നീന്തലിലും മെഡല്‍ സ്വന്തമാക്കി. നേരത്തെ 50 മീറ്റര്‍ ഫ്രീസ്റ്റൈല്‍, 100 മീറ്റര്‍ ബട്ടര്‍ഫ്‌ളൈ, 100 മീറ്റര്‍ ഫ്രീസ്റ്റൈല്‍, 4-100 മീറ്റര്‍ മെഡല്‍ റിലേ എന്നിവയിലാണ് താരം സ്വര്‍ണ്ണം നേടിയത്.
ഇതില്‍ രണ്ടിനത്തില്‍ ലോക റെക്കോഡും ഒരിനത്തില്‍ ഒളിംപിക് റെക്കോഡും ഡ്രെസല്‍ കരസ്ഥമാക്കി. മാര്‍ക്ക് സ്പിറ്റ്‌സ്, മാറ്റി ബിയോന്‍ഡി, മൈക്കല്‍ ഫെല്‍പ്‌സ് എന്നിവരാണ് മുമ്പ് ഒരു ഒളിംപിക്‌സില്‍ അഞ്ച് സ്വര്‍ണ്ണം നേടിയ ഇതിഹാസ താരങ്ങള്‍. ഇതിഹാസ നീന്തല്‍ താരം മൈക്കല്‍ ഫെല്‍പ്‌സിന്റെ പിന്‍ഗാമിയായാണ് 24കാരനായ ഡ്രെസല്‍ അറിയപ്പെടുന്നത്.