സ്പാനിഷ് ഇന്റര്‍നാഷണല്‍ ഓപ്പണ്‍ ഇന്ത്യന്‍ താരങ്ങള്‍ക്ക് നഷ്ടമാവും
ദുബായില്‍ നടന്ന ടൂര്‍ണ്ണമെന്റില്‍ ഇന്ത്യ നാല് സ്വര്‍ണ്ണം അടക്കം 17 മെഡല്‍ നേടിയിരുന്നു.
മാഡ്രിഡ്: ടോക്കിയോ ഒളിംപിക്‌സിന് മുന്നോടിയായുള്ള സ്പാനിഷ് ഇന്റര്‍നാഷണല്‍ ഓപ്പണിന് ഇന്ത്യന്‍ പാരാ ഷട്ടില്‍ താരങ്ങള്‍ക്ക് പങ്കെടുക്കാന്‍ കഴിയില്ല. മെയ്യ് 11 മുതല്‍ 16 വരെ സ്‌പെയിനില്‍ നടക്കുന്ന ടൂര്‍ണ്ണമെന്റിന് എത്തുന്ന ഇന്ത്യന്‍ താരങ്ങള്‍ 10 ദിവസത്തെ ക്വാറന്റീനില്‍ കഴിയണമെന്ന് സ്പാനിഷ് സര്‍ക്കാരിന്റെ തീരുമാനമാണ് തിരിച്ചടിയായത്. ഇതോടെ താരങ്ങളുടെ യാത്ര ഒഴിവാക്കുകയായിരുന്നു. ലോക ഒന്നാം നമ്പര്‍ ഇന്ത്യയുടെ പ്രമോദ് ഭഗത്, മറ്റൊരു പ്രധാന താരമായ സുഗാന്ത് കദം എന്നിവരാണ് ഇന്ത്യയെ പ്രതിനിധീകരിക്കേണ്ടിയിരുന്നത്. കഴിഞ്ഞ മാസം ദുബായില്‍ നടന്ന ടൂര്‍ണ്ണമെന്റില്‍ ഇന്ത്യ നാല് സ്വര്‍ണ്ണം അടക്കം 17 മെഡല്‍ നേടിയിരുന്നു.