ഇന്ത്യന്‍ ഹോക്കിക്ക് തീരാനഷ്ടം; രൂപീന്ദര്‍ പാല്‍ സിങും ബിരേന്ദ്ര ലക്രയും വിരമിച്ചു
ഇന്ത്യന്‍ ടീമിലെ എക്കാലത്തെയും മികച്ച ഡ്രാഗ് ഫ്‌ളിക്കറാണ്.
ഡല്‍ഹി: ടോക്കിയോ ഒളിംപിക്‌സില്‍ ഇന്ത്യക്ക് വെങ്കല മെഡല്‍ സമ്മാനിച്ച ടീമിലെ പ്രധാന താരങ്ങളായ രൂപീന്ദര്‍ പാല്‍ സിങ്, ബിരേന്ദ്ര ലക്കറ എന്നിവര്‍ അന്താരാഷ്ട്ര ഹോക്കിയില്‍ നിന്നും വിരമിച്ചു. മണിക്കൂറുകളുടെ വൃത്യാസത്തിലാണ് ലോകത്തിലെ മികച്ച രണ്ട് ഇന്ത്യന്‍ ഹോക്കി താരങ്ങള്‍ വിരമിക്കല്‍ പ്രഖ്യാപനം നടത്തിയത്. 30 കാരനായ രൂപീന്ദര്‍ സോഷ്യല്‍ മീഡിയ വഴിയാണ് വിരമിക്കല്‍ പ്രഖ്യാപനം നടത്തിയത്. ഇന്ത്യന്‍ ടീമിലെ എക്കാലത്തെയും മികച്ച ഡ്രാഗ് ഫ്‌ളിക്കറാണ്. 13 വര്‍ഷം ഇന്ത്യയ്ക്കായി കളിച്ച താരം 223 മല്‍സരങ്ങളില്‍ നിന്ന് 119 ഗോളുകള്‍ നേടിയിട്ടുണ്ട്. ടോക്കിയോ ഒളിംപിക്‌സില്‍ ഇന്ത്യയ്ക്ക് വേണ്ടി മൂന്ന് ഗോളുകള്‍ നേടിയിരുന്നു.യുവതാരങ്ങള്‍ക്ക് വേണ്ടി സ്ഥാനം ഒഴിയുകയാണെന്ന് താരം അറിയിച്ചു. പ്രതിരോധ നിരയിലെ ഏറ്റവും വിശ്വസ്തനായ താരമെന്നാണ് 34കാരനായ ബിരേന്ദ്ര ലക്ര അറിയപ്പെടുന്നത്. ലോകത്തിലെ തന്നെ മികച്ച പ്രതിരോധതാരമാണ്. ഒളിംപിക്‌സ് ടീമിലെ വൈസ് ക്യാപ്റ്റനായിരുന്നു. ഇന്ത്യയ്ക്കായി 201 മല്‍സരങ്ങള്‍ കളിച്ചിട്ടുണ്ട്.