കേരള സ്റ്റോറിക്കെതിരേ മുഖ്യമന്ത്രി; ആര്‍എസ്എസ് അജണ്ട; കേരളത്തെ അപമാനിക്കാന്‍ ശ്രമം
തിരുവനന്തപുരം: കേരള സ്റ്റോറി സിനിമ പ്രദര്‍ശനത്തിനെതിരെ മുഖ്യമന്ത്രി പിണറായി വിജയന്‍. കേരള സ്റ്റോറി ആര്‍എസ്എസ് അജണ്ടയാണെന്നും കെണിയില്‍ വീഴരുതെന്നും മുഖ്യമന്ത്രി പറഞ്ഞു. കേരളത്തെ അപമാനിക്കാന്‍ ശ്രമിക്കുകയാണെന്ന് അദ്ദേഹം പറഞ്ഞു. രാഷ്ട്രീയ ലക്ഷ്യത്തോടെ കൊണ്ടുവന്ന ഒരു കാര്യമാണെന്നും അതിന് കൂടുതല്‍ പ്രചാരണം കൊടുക്കുന്നതില്‍ കൃത്യമായ ഉദ്ദേശങ്ങളുണ്ടെന്ന് മുഖ്യമന്ത്രി മാധ്യമങ്ങളോട് പറഞ്ഞു.
'ഈ നാട് സാഹോദര്യത്തിന്റെ നാടാണ്. നവോത്ഥാന കാലം മുതല്‍ ജാതിഭേദമന്യേ വാഴുന്ന നാടാണ് കേരളം. ഈ നാടിനെ വല്ലാത്ത അവമതിപ്പ് ഉണ്ടാക്കുന്ന നാടാക്കി ചിത്രീകരിക്കാനുള്ള ശ്രമമാണ് നടക്കുന്നത്. ഈ ശ്രമം ചെറുക്കേണ്ടതാണ്' മുഖ്യമന്ത്രി പറഞ്ഞു. ആര്‍എസ്എസ് ന്യൂനപക്ഷങ്ങളെ ലക്ഷ്യമിടുന്നുവെന്ന് മുഖ്യമന്ത്രി വിമര്‍ശിച്ചു. ഹിറ്റലറുടെ ആശയം നടപ്പാക്കുന്ന രീതിയാണെന്നും അദ്ദേഹം പറഞ്ഞു.