ജിദ്ദ: യന്ത്രത്തകരാര്‍ കാരണം കോഴിക്കോട്ടേക്കുള്ള വിമാനം ജിദ്ദയില്‍ പറന്നുയര്‍ന്നതിനു പിന്നാലെ തിരിച്ചിറക്കി. സ്‌പൈസ്‌ജെറ്റ് 036 വിമാനമാണ് പറന്നുയര്‍ന്ന് ഒരു മണിക്കൂറിനു ശേഷം പൈലറ്റ് തിരിച്ചിറക്കിയത്. വ്യാഴാഴ്ച രാവിലെ 9.45ന് പോലേണ്ടിയിരുന്ന വിമാനം വൈകി 10.40നാണ് പുറപ്പെട്ടത്. 11.30ഓടെ എന്‍ജിന്‍ തകരാര്‍ കാരണം ജിദ്ദയില്‍ തന്നെ തിരിച്ചിറക്കുകയായിരുന്നു. വിമാനം പറന്നുയര്‍ന്ന സമയത്ത് എസി പ്രവര്‍ത്തിച്ചിരുന്നില്ലെന്ന് യാത്രക്കാര്‍ പറയുന്നു. വിമാനത്തിന്റെ ഇടത് ഭാഗത്തായി ഫാനിന്റെ ഭാഗത്തുനിന്ന് ഉച്ചത്തിലുള്ള ശബ്ദം കേട്ടതായും പുക ഉയര്‍ന്നെന്നുമാണ് പറയപ്പെടുന്നത്. വിമാനത്തിന്റെ തകരാര്‍ ഒന്നര മണിക്കൂറിനുള്ളില്‍ പരിഹരിച്ചാല്‍ യാത്രക്കാരെ ഇതേ വിമാനത്തില്‍ തന്നെ കൊണ്ടുപോവുമെന്ന് അധികൃതര്‍ അറിയിച്ചെങ്കിലും പരിഹരിക്കാന്‍ കഴിഞ്ഞിരുന്നില്ല. തുടര്‍ന്ന് യാത്രക്കാരെ വിമാനത്തില്‍ നിന്ന് ഇറക്കി ലോഞ്ചിലേക്ക് മാറ്റുകയായിരുന്നു.