കൊച്ചി: കളമശ്ശേരി സ്‌ഫോടന പരമ്പരയില്‍ കൊല്ലപ്പെട്ടവരുടെ എണ്ണം ആറായി. ഗുരുതരമായി പൊള്ളലേറ്റ് ചികില്‍സയിലായിരുന്ന മലയാറ്റൂര്‍ സ്വദേശി പ്രവീണ്‍(24) ആണ് മരിച്ചത്. വ്യാഴാഴ്ച രാത്രി 10.40നാണ് പ്രവീണിന്റെ മരണം സ്ഥിരീകരിച്ചത്. മൃതദേഹം പോസ്റ്റ്‌മോര്‍ട്ടത്തിനായി കളമശ്ശേരി മെഡിക്കല്‍ കോളജിലേക്ക് മാറ്റി. സ്‌ഫോടനത്തില്‍ പ്രവീണിന്റെ മാതാവ് മലയാറ്റൂര്‍ സ്വദേശിനി സാലി പ്രദീപനും സഹോദരി ലിബിനയും മരണത്തിന് കീഴടങ്ങിയിരുന്നു. 12കാരി ലിബിന സ്‌ഫോടനദിവസവും മാതാവ് സാലി ഇക്കഴിഞ്ഞ 11നുമാണ് മരണപ്പെട്ടത്. ലിബിനയെ രക്ഷിക്കാന്‍ ശ്രമിക്കുന്നതിനിടെയാണ് പ്രവീണിന് പൊള്ളലേറ്റത്. ഇതോടെ കളമശ്ശേരി സ്‌ഫോടന പരമ്പരയില്‍ ഒരു കുടുംബത്തിലെ മൂന്ന് പേര്‍ മരണത്തിന് കീഴടങ്ങി. പ്രവീണിന്റെ സഹോദരന്‍ രാഹുലും പരിക്കേറ്റ് ചികില്‍സയിലാണ്. ആകെ 16 പേരാണ് വിവിധ ആശുപത്രികളില്‍ നിലവില്‍ ചികില്‍സയിലുള്ളത്. ഇതില്‍ ഗുരുതരമായി പൊള്ളലേറ്റ എട്ട് പേര്‍ തീവ്രപരിചരണ വിഭാഗത്തില്‍ ചികില്‍സയിലാണ്. അതിനിടെ, കളമശ്ശേരി സ്‌ഫോടന പരമ്പരയിലെ പ്രതി ഡൊമിനിക്ക് മാര്‍ട്ടിനില്‍ നിന്ന് തെളിവെടുപ്പിനിടെ നിര്‍ണായക വിവരങ്ങള്‍ ലഭിച്ചതായാണു വിവരം.