തീപാറിയ പോരാട്ടത്തില്‍ ബാഴ്‌സയ്ക്ക് ജയം
യൂനൈറ്റഡിന്റെ സ്വന്തം മൈതാനത്ത് നടന്ന മത്സരത്തില്‍ പന്ത്രണ്ടാം മിനിറ്റില്‍ ലൂക്ക് ഷോ അടിച്ച സെല്‍ഫ് ഗോളാണ് യുനൈറ്റഡിനെ തകര്‍ത്തത്.
ഓള്‍ഡ് ട്രാഫഡ്: ചാംപ്യന്‍സ് ലീഗ് ക്വാര്‍ട്ടറിന്റെ ആദ്യ പാദത്തില്‍ മാഞ്ചസ്റ്റര്‍ യുനൈറ്റഡിനെ ബാഴ്‌സലോണ ഒരു ഗോളിന് തോല്‍പ്പിച്ചു. യൂനൈറ്റഡിന്റെ സ്വന്തം മൈതാനത്ത് നടന്ന മത്സരത്തില്‍ പന്ത്രണ്ടാം മിനിറ്റില്‍ ലൂക്ക് ഷോ അടിച്ച സെല്‍ഫ് ഗോളാണ് യുനൈറ്റഡിനെ തകര്‍ത്തത്. ഓള്‍ഡ് ട്രാഫഡില്‍ ബാഴ്‌സയുടെ ആദ്യ വിജയമാണ് ഇത്. മെസി നല്‍കിയ പന്ത് സുവാരസ് ഹെഡറിലൂടെ ഗോളാക്കാന്‍ ശ്രമിക്കവേ യുനൈറ്റഡിന്റെ ഡിഫന്‍ഡര്‍ ലൂക്ക് ഷോയുടെ കാലില്‍ തട്ടി വലയില്‍ പതിക്കുകയായിരുന്നു.
30ാം മിനിറ്റില്‍ ക്രിസ് സ്മാളിങ്ങിന്റെ ഫൗളില്‍ മെസിക്ക് പരിക്കേറ്റത് ആശങ്ക സൃഷ്ടിച്ചു. മൂക്കില്‍ നിന്ന് രക്തം വന്നതിനെ തുടര്‍ന്ന് ചികിത്സ തേടിയശേഷമാണ് മെസി വീണ്ടും കളിക്കളത്തിലിറങ്ങിയത്. തിരിച്ചടിക്ക് യുനൈറ്റഡ് ശ്രമിച്ചെങ്കിലും ബാഴ്‌സയുടെ പ്രതിരോധത്തില്‍ തകര്‍ന്നു വീഴുകയായിരുന്നു. അതേസമയം യുവന്റസ് അയാക്‌സ് മത്സരം ഇരുപക്ഷവും ഓരോ ഗോളടിച്ച് സമനിലയില്‍ പിരിഞ്ഞു.