ന്യൂയോര്‍ക്: ഫുട്‌ബോള്‍ കരിയറില്‍ 500 ഗോളുകള്‍ സ്വന്തമാക്കി സ്വീഡിഷ് സൂപ്പര്‍ താരം സ്ലാട്ടന്‍ ഇബ്രാഹിമോവിച്ച്. അമേരിക്കന്‍ മേജര്‍ ലീഗില്‍ ഞായറാഴ്ച ടൊറന്റോയ്‌ക്കെതിരേ നടന്ന മല്‍സരത്തിലാണ് എല്‍ എ ഗ്യാലക്‌സി താരമായ ഇബ്ര തന്റെ 500ാം ഗോള്‍ കണ്ടെത്തിയത്. അന്താരാഷ്ട്ര കരിയറില്‍ നിലവില്‍ കളിച്ച് കൊണ്ടിരിക്കുന്ന താരങ്ങളില്‍ 500 ഗോളുകള്‍ കണ്ടെത്തുന്ന മൂന്നാം താരമാണ് ഇബ്ര. സൂപ്പര്‍ താരങ്ങളായ ക്രിസ്റ്റ്യാനോ റൊണാള്‍ഡോയും ലയണല്‍ മെസിയുമാണ് നിലവില്‍ കളിച്ച് കൊണ്ടിരിക്കുന്നവരില്‍ 500 ഗോളുകള്‍ നേടിയിട്ടുള്ള മറ്റ് താരങ്ങള്‍.
ക്ലബ്ബ് കരിയറില്‍ 747 മല്‍സരങ്ങളില്‍ 438 ഗോളുകള്‍ നേടിയിട്ടുള്ള ഈ 36 കാരന്‍ ദേശീയ ടീമിന് വേണ്ടി 114 മല്‍സരങ്ങളില്‍ 62 തവണ വല കുലുക്കിയിട്ടുണ്ട്.