കൊവിഡ് കുറയുന്നു; രാജ്യത്ത് പ്രതിദിന കേസുകള്‍ അരലക്ഷത്തില്‍ താഴെ, ടിപിആര്‍ 3.21

ന്യൂഡല്‍ഹി: രാജ്യത്ത് പ്രതിദിന കൊവിഡ് കേസുകളുടെ എണ്ണം കുറയുന്നു. കഴിഞ്ഞ 24 മണിക്കൂറിനകം 42,640 കൊവിഡ് കേസുകളാണ് റിപോര്‍ട്ട് ചെയ്തത്. രാജ്യത്ത് 91 ദിവസത്തിനിടെയുണ്ടായ ഏറ്റവും കുറഞ്ഞ കണക്കാണ് ഇന്നത്തേത്. പ്രതിദിന ടെസ്റ്റ് പോസിറ്റിവിറ്റി നിരക്ക് 3.21 ശതമാനമായി കുറഞ്ഞു. 1167 പേരാണ് കഴിഞ്ഞ ദിവസം കൊവിഡ് ബാധിച്ച് മരിച്ചത്.

ഇന്ന് റിപ്പോര്‍ട്ട് ചെയ്തവയില്‍ കേരളമടക്കം എല്ലാ സംസ്ഥാനങ്ങളിലും കേസുകള്‍ പതിനായിരത്തില്‍ താഴെയാണ്. കര്‍ണാടകയിലും മഹാരാഷ്ട്രയിലും മാത്രമാണ് ഒരുലക്ഷത്തില്‍ കൂടുതല്‍ രോഗികള്‍ ചികിത്സയിലുള്ളത്. ടിപിആര്‍ കുറഞ്ഞതും രോഗമുക്തി നിരക്ക് കൂടിയതും ആശ്വാസകരമാണ്. രാജ്യത്ത് 28,87,66,201 പേര്‍ക്ക് ഇതുവരെ വാക്‌സിന്‍ കുത്തിവയ്പ്പ് എടുത്തതായും ആരോഗ്യ മന്ത്രാലയം അറിയിച്ചു.