കേരള ശാസ്ത്രപുരസ്‌കാരം പ്രഫ. എംഎസ് സ്വാമിനാഥനും പ്രഫ. താണു പത്മനാഭനും

തിരുവനന്തപുരം: ശാസ്ത്രപ്രതിഭകള്‍ക്ക് സംസ്ഥാനം നല്‍കുന്ന ഏറ്റവും വലിയ അംഗീകാരമായ കേരള ശാസ്ത്രപുരസ്‌കാരം ഇന്ത്യന്‍ ശാസ്ത്രരംഗത്തെ മഹാരഥന്മാരായ പ്രഫ. എംഎസ് സ്വാമിനാഥനും, പ്രഫ. താണു പത്മനാഭനും ഇത്തവണ സമ്മാനിക്കും. ആജീവനാന്ത സംഭാവനകള്‍ പരിഗണിച്ചാണ് രണ്ടു പേരേയും പുരസ്‌കാരത്തിനായി തിരഞ്ഞെടുത്തത്. മുരടിച്ചു നിന്നിരുന്ന നമ്മുടെ കാര്‍ഷികമേഖലയെ ആധുനിക ശാസ്ത്രരീതികളിലൂടെ അടിമുടി പരിഷ്‌കരിച്ചുകൊണ്ട് നേട്ടങ്ങളിലേയ്ക്ക് നയിച്ച ഹരിതവിപ്ലവത്തിന്റെ ആസൂത്രകനാണ് പ്രഫ. എംഎസ് സ്വാമിനാഥന്‍.

പ്രപഞ്ചത്തിലെ വിന്യാസങ്ങളുടെ രൂപീകരണം, ഗുരുത്വാകര്‍ഷണം, ക്വാണ്ടം ഗുരുത്വം തുടങ്ങി ഭൗതികശാസ്ത്രത്തിന്റെ വിവിധമേഖലകളില്‍ അറിവിന്റെ പുതിയ വാതായനങ്ങള്‍ തുറന്നിട്ട പ്രതിഭാശാലിയാണ് പ്രഫ. താണു പത്മനാഭന്‍. രണ്ട് ലക്ഷം രൂപയും പ്രശസ്തി പത്രവും ഫലകവും അടങ്ങിയതാണ് കേരള ശാസ്ത്ര പുരസ്‌കാരം. ശാസ്ത്ര സാങ്കേതിക വകുപ്പും കേരള സംസ്ഥാന ശാസ്ത്ര സാങ്കേതിക പരിസ്ഥിതി കൗണ്‍സിലും സംയുക്തമായാണ് പുരസ്‌കാരം നല്‍കുന്നതെന്ന് മുഖ്യമന്ത്രി ഫേസ് ബുക്കില്‍ കുറിച്ചു.