ഹ്രസ്വചലച്ചിത്ര മേള: എആര്‍ റഹ്മാന്‍ അവതരിപ്പിക്കുന്ന ഐ ടൈല്‍സ് പാക്കേജ് നാളെ

തിരുവനന്തപുരം: ഓസ്‌കാര്‍ അവാര്‍ഡ് ജേതാവ് എ ആര്‍ റഹ്മാന്‍ അവതരിപ്പിക്കുന്ന പ്രത്യേക പാക്കേജ് ഐ ടൈല്‍സ് രാജ്യാന്തര ഹ്രസ്വ ചലച്ചിത്ര മേളയുടെ നാലാം ദിവസം പ്രദര്‍ശിപ്പിക്കും. ഐ ഫോണ്‍ ഉപയോഗിച്ച് സ്ത്രീകള്‍ നിര്‍മ്മിച്ച അഞ്ചു സിനിമകളാണ് തിരശീലയിലെത്തുന്നത്. വിഖ്യാത ഇറാനിയന്‍ സംവിധായകന്‍ മൊഹ്‌സെന്‍ മഖ്മല്‍ബഫിന്റെ മേല്‍നോട്ടത്തിലാണ് ചിത്രങ്ങള്‍ നിര്‍മ്മിച്ചിരിക്കുന്നത്.

മഹാരാഷ്ട്രയിലെ ലവണി നര്‍ത്തകരുടെ ആത്മസംഘര്‍ഷങ്ങളും പ്രതീക്ഷകളും പ്രമേയമാക്കുന്നതാണ് ഈ വിഭാഗത്തിലെ രാജശ്രീ ദേശ് പാണ്ഡെയുടെ ഡിസ്‌റ്റോര്‍റ്റഡ് മിറേഴ്‌സ്. സവിതാ സിംഗ് ചിത്രം മല്‍ബറി, പൂജ ശ്യാം പ്രഭാതിന്റെ വൈ മാ,മധുമിതാ വേണുഗോപാലിന്റെ സ്‌പെയ്‌സസ്,കുട്ടി രേവതി ചിത്രം അകമുകം എന്നിവയാണ് ഈ വിഭാഗത്തിലെ ചിത്രങ്ങള്‍.എ ആര്‍ റഹ്മാനാണ് ചിത്രങ്ങള്‍ പരിചയപ്പെടുത്തുന്നത്. ആഗസ്റ്റ് 29ന് രാവിലെ 11.15ന് നിള തിയേറ്ററിലാണ് ചിത്രങ്ങള്‍ പ്രദര്‍ശിപ്പിക്കുന്നത്.