കണ്ണൂരില്‍ നിയന്ത്രണം വിട്ട കാര്‍ നിര്‍ത്തിയിട്ട ബസിലിടിച്ചു; കണ്ടക്ടര്‍ക്ക് ദാരുണാന്ത്യം

കണ്ണൂര്‍: ഇരിട്ടിയില്‍ നിയന്ത്രണം വിട്ട കാര്‍ നിര്‍ത്തിയിട്ട ബസിലിടിച്ച് കണ്ടക്ടര്‍ക്ക് ദാരുണാന്ത്യം. ബംഗ്ലൂരില്‍ നിന്നും കണ്ണൂരിലേക്ക് വരികയായിരുന്ന കര്‍ണ്ണാടക ആര്‍ടിസി ബസ്സിലെ കണ്ടക്ടര്‍ കര്‍ണ്ണാടക സ്വദേശി പി പ്രകാശാണ് മരിച്ചത്.സംഭവസ്ഥലത്തുവച്ച് തന്നെ കണ്ടക്ടര്‍ മരണപ്പെട്ടു.

രാവിലെ 6 മണിയോടെയാണ് അപകടമുണ്ടായത്. കര്‍ണാടകയില്‍ നിന്നെത്തിയ ആര്‍ടിസി ബസ് ഉളിയില്‍ ചായ കുടിക്കാനായി നിര്‍ത്തിയിട്ടിരിക്കുകയായിരുന്നു. കണ്ടക്ടര്‍ പുറത്തേക്കിറങ്ങവേ കാര്‍ വന്ന് ഇടിക്കുകയായിരുന്നു. ഇടിയില്‍ ഇയാള്‍ ബസിനും കാറിനുമിടയില്‍ പെട്ടാണ് മരണം സംഭവിച്ചത്.

കാര്‍ ഡ്രൈവറായ മാഹി സ്വദേശി മുഹമ്മദിനെ ഗുരുതര പരുക്കുകളോടെ തലശ്ശേരി താലൂക്ക് ആശുപത്രിയിലേക്ക് മാറ്റി.ഡ്രൈവര്‍ ഉറങ്ങിപ്പോയതാവാം അപകടകാരണമെന്നാണ് പ്രാഥമിക നിഗമനം.