ഇടയിരിക്കപ്പുഴ സിഎച്ച്‌സിയില്‍ കൊവിഡ് പരിശോധന പുനരാരംഭിക്കണം: എസ്ഡിപിഐ നിവേദനം നല്‍കി

പത്തനാട്: കങ്ങഴ പഞ്ചായത്തിലെ ഇടയിരിക്കപ്പുഴ കമ്മ്യൂണിറ്റി ഹെല്‍ത്ത് സെന്ററില്‍ കൊവിഡ് പരിശോധനകള്‍ പുനരാരംഭിക്കണമെന്നാവശ്യപ്പെട്ട് എസ്ഡിപിഐ കങ്ങഴ പഞ്ചായത്ത് കമ്മിറ്റി കോട്ടയം ജില്ലാ കലക്ടര്‍, ജില്ലാ മെഡിക്കല്‍ ഓഫിസര്‍, വാഴൂര്‍ ബ്ലോക്ക് പഞ്ചായത്ത് പ്രസിഡന്റ് തുടങ്ങിയവര്‍ക്ക് നിവേദനം നല്‍കി.

കൊവിഡിന്റെ ഒന്നും രണ്ടും തരംഗ സമയത്ത് ഇവിടെ കൊവിഡ് പരിശോധനകള്‍ നടത്തിയിരുന്നു. എന്നാല്‍, ഇപ്പോള്‍ വളരെ ആശങ്കാജനകമായ അവസ്ഥയില്‍ കൊവിഡ് വ്യാപിക്കുകയാണ്. കങ്ങഴ, മണിമല, നെടുംകുന്നം, വാഴൂര്‍, വെള്ളാവൂര്‍ എന്നീ പഞ്ചായത്തിലെ ഭൂരിഭാഗം വരുന്ന സാധാരണക്കാരായ ജനങ്ങളുടെ ആശ്രയ കേന്ദ്രമാണ് ഇടയിരിക്കപ്പുഴ സിഎച്ച്‌സി. കൊവിഡ് പരിശോധനകള്‍ വളരെ ചെലവേറിയതിനാല്‍ സാധാരണ ജനങ്ങള്‍ക്ക് അത് വഹിക്കാന്‍ പറ്റാത്ത അവസ്ഥയാണ്.

അതിനാല്‍, ഇടയിരിക്കപ്പുഴ സിഎച്ച്‌സിയില്‍ കൊവിഡ് ആന്റിജന്‍, ആര്‍ടിപിസിആര്‍ പരിശോധനകള്‍ പുനരാരംഭിക്കാനുള്ള അടിയന്തര നടപടികള്‍ സ്വീകരിക്കണമെന്ന് എസ്ഡിപിഐ കങ്ങഴ പഞ്ചായത്ത് കമ്മിറ്റി പ്രസിഡന്റ് എം കെ സുബൈര്‍, സെക്രട്ടറി കെ എ അജീബ് എന്നിവര്‍ നിവേദനത്തില്‍ ആവശ്യപ്പെട്ടു.