അട്ടപ്പാടിയില്‍ നാല് ദിവസത്തിനുള്ളില്‍ മൂന്നാമത്തെ ശിശുമരണം നടന്നിട്ടും സര്‍ക്കാര്‍ നോക്കുത്തി: എസ്ഡിപിഐ

മണ്ണാര്‍ക്കാട്: അട്ടപ്പാടി ഊരുകളില്‍ ശിശുമരണം ഒരു തുടര്‍ക്കഥയാവുമ്പോഴും സംസ്ഥാന- കേന്ദ്ര സര്‍ക്കാരുകള്‍ നോക്കുത്തിയായിരിക്കുകയാണെന്ന് എസ്ഡിപിഐ മണ്ണാര്‍ക്കാട് മണ്ഡലം പ്രസിഡന്റ് സമീര്‍ ചോമേരി. അട്ടപ്പാടിയിലെ കുഞ്ഞുങ്ങളുടെ തുടര്‍ച്ചയായുള്ള മരണം സര്‍ക്കാരുകള്‍ നിഷ്‌ക്രിയ നിലപാടുകള്‍ തുടര്‍ന്നാല്‍ എസ്ഡിപിഐ ശക്തമായ സമരം സംഘടിപ്പിക്കുമെന്നും അദ്ദേഹം കൂട്ടിച്ചേര്‍ത്തു.

അട്ടപ്പാടിയില്‍ മൂന്നുദിവസം പ്രായമായ ആണ്‍കുഞ്ഞാണ് അവസാനമായി മരിച്ചത്. മണ്ണാര്‍ക്കാട് താലൂക്ക് ആശുപത്രിയിലായിരുന്നു കുഞ്ഞിന്റെ മരണം. വീട്ടിയൂര്‍ ആദിവാസി ഊരിലെ ഗീതു- സുനീഷ് ദമ്പതികളുടെ ആണ്‍കുഞ്ഞാണ് മരിച്ചത്. കഴിഞ്ഞ നാലുദിവസത്തിനുള്ളില്‍ അട്ടപ്പാടിയില്‍നിന്ന് റിപോര്‍ട്ട് ചെയ്യുന്ന മൂന്നാമത്തെ മരണമാണ് ഇത്. ഈവര്‍ഷം ഇതുവരെ 10 കുട്ടികള്‍ മരിച്ചുവെന്നാണ് കണക്ക്.