എംഡിഎംഎ സിനിമ നടിമാര്‍ക്ക് നല്‍കാന്‍ കൊണ്ടുവന്നതെന്ന് പ്രതി

മലപ്പുറം: എംഡിഎംഎ സിനിമ നടിമാര്‍ക്ക് നല്‍കാന്‍ കൊണ്ടുവന്നതെന്നു ലഹരി മരുന്നു കടത്തില്‍ അറസ്റ്റിലായ പ്രതി. കോഴിക്കോട് ബൈപാസിനോട് ചേര്‍ന്ന ആഡംബര റിസോര്‍ട്ടിന്റെ പാര്‍ക്കിങ് ഏരിയയില്‍ നിന്നാണ് 510 ഗ്രാം എം ഡി എം എ പിടികൂടിയത്. കേസില്‍ കാളികാവ് സ്വദേശി മുഹമ്മദ് ഷബീബിനെ പോലിസ് അറസ്റ്റ് ചെയ്തു.

പോലിസിനു ലഭിച്ച രഹസ്യ വിവരത്തിന്റെ അടിസ്ഥാനത്തില്‍, ഇന്നലെ വൈകിട്ട് ജില്ലയിലെ പഞ്ചനക്ഷത്ര ഹോട്ടലിന്റെ പാര്‍ക്കിങ് ഏരിയയില്‍ നടത്തിയ പരിശോധനയിലാണ്് അരക്കിലോയില്‍ അധികം സിന്തറ്റിക്ക് ലഹരിമരുന്ന് കണ്ടെത്തിയത്.

ഒമാനില്‍ ജോലി ചെയ്തിരുന്ന മുഹമ്മദ് ഷബീബ് രണ്ടുമാസം മുമ്പാണ് നാട്ടിലെത്തിയത്. ചെമ്മാട് സ്വദേശി അബു താഹിര്‍ ആണ് ഷബീബിന്റെ നിര്‍ദേശപ്രകാരം എംഡിഎംഎ വിദേശത്തുനിന്ന് എത്തിച്ചത്. ഒമാനില്‍നിന്നു പാല്‍പ്പൊടി പാക്കറ്റുകളിലാക്കിയായിരുന്നു ഇത് കടത്തിയത്. സിനിമാ നടിമാര്‍ക്കു വേണ്ടിയാണ് ലഹരി മരുന്ന് എത്തിച്ചതെന്നാണ് പ്രതി പോലിസിനോട് പറഞ്ഞത്. എന്നാല്‍ ഏത് നടിമാര്‍ക്ക് വേണ്ടിയാണ് ലഹരി മരുന്ന് എത്തിച്ചതെന്ന് വ്യക്തല്ല. മൊഴിയുടെ അടിസ്ഥാനത്തില്‍ പോലിസ് അന്വേഷണം ആരംഭിച്ചു.