ചൂണ്ടയിടുന്നതിനിടെ പാറക്കുളത്തിൽ വീണു, രണ്ട് കുട്ടികൾക്ക് ദാരുണാന്ത്യം; അപകടം കോട്ടയത്ത്

കോട്ടയം: ചങ്ങനാശേരി തൃക്കൊടിത്താനത്ത് രണ്ട് കുട്ടികള്‍ കുളത്തില്‍ മുങ്ങി മരിച്ചു. മാടപ്പള്ളി പൊന്‍പുഴക്കുന്നില്‍ താമസിക്കുന്ന ആദര്‍ശ്, അഭിനവ് എന്നിവരാണ് മരിച്ചത്. ശനിയാഴ്ച ചെമ്പുംപുറത്ത് പാറക്കുളത്തില്‍ വീണായിരുന്നു അപകടം. ചൂണ്ടയിടുന്നതിനിടെയാണ് കുട്ടികള്‍ കുളത്തില്‍വീണത്.

ചൂണ്ടയിടുന്നതിനിടെ ഒരാള്‍ കാല്‍ വഴുതി കുളത്തില്‍ വീഴുകയും രക്ഷിക്കാന്‍ ശ്രമിക്കവേ രണ്ടാമത്തെ കുട്ടിയും വെള്ളത്തില്‍ വീഴുകയായിരുന്നുവെന്നാണ് വിവരം. ചങ്ങനാശ്ശേരി ഫയര്‍ഫോഴ്‌സും നാട്ടുകാരും ചേര്‍ന്ന് നടത്തിയ തിരച്ചിലില്‍ മൃതദേഹങ്ങള്‍ പാറക്കുളത്തില്‍നിന്ന് പുറത്തെടുത്തു. മൃതദേഹങ്ങള്‍ ചങ്ങനാശ്ശേരി ജനറല്‍ ആശുപത്രിയിലേക്ക് മാറ്റി. അഭിനവ് ആറാം ക്ലാസ് വിദ്യാര്‍ഥിയാണ്. ആദര്‍ശ് പത്താം ക്ലാസിലും.