സിപിഎം പ്രവര്‍ത്തകന്‍ അമ്പലത്തിന്‍കാല അശോകന്‍ വധക്കേസ്: എട്ട് ആര്‍എസ്എസ് പ്രവര്‍ത്തകര്‍ക്ക് ജീവപര്യന്തം

തിരുവനന്തപുരം: സിപിഎം പ്രവര്‍ത്തകന്‍ അമ്പലത്തിന്‍കാല അശോകന്‍ വധക്കേസില്‍ എട്ട് ആര്‍എസ്എസ് പ്രവര്‍ത്തകര്‍ക്ക് ജീവപര്യന്തം ശിക്ഷയും അമ്പതിനായിരം രൂപ പിഴയും വിധിച്ച് കോടതി. ആദ്യ അഞ്ച് പ്രതികള്‍ക്ക് ഇരട്ട ജീവപര്യന്തവും, മറ്റ് പ്രതികള്‍ക്ക് ജീവപര്യന്തം ശിക്ഷയുമാണ് വിധിച്ചത്. കൊലപാതകം നടന്ന് പതിനൊന്ന് വര്‍ഷങ്ങള്‍ക്കു ശേഷമാണ് വിധി വരുന്നത്.

ജനുവരി പത്തിനാണ് സിപിഎം പ്രവര്‍ത്തകനായ അശോകന്‍ കൊലപാതകക്കേസില്‍ എട്ട് ആര്‍എസ്എസ് പ്രവര്‍ത്തകര്‍ കുറ്റക്കാരാണെന്ന് തിരുവനന്തപുരം അഡീഷണല്‍ സെഷന്‍സ് കോടതി കണ്ടെത്തിയത്. കേസില്‍ എട്ട് പേരെ കോടതി വെറുതെ വിട്ടിരുന്നു.

ഒന്നാംപ്രതി ആമച്ചല്‍ തലക്കോണം തെക്കേകുഞ്ചുവീട്ടില്‍ ശംഭുകുമാര്‍, രണ്ടാംപ്രതി കുരുതംകോട് എസ് എം സദനത്തില്‍ ശ്രീജിത്, മൂന്നാംപ്രതി കുരുതംകോട് മേലേ കുളത്തിന്‍കര വീട്ടില്‍ ഹരികുമാര്‍, നാലാംപ്രതി കുരുതംകോട് താരാഭവനില്‍ ചന്ദ്രമോഹന്‍, അഞ്ചാംപ്രതി തലക്കോണം തെക്കേകുഞ്ചുവീട്ടില്‍ സന്തോഷ് എന്നിവര്‍ക്കാണ് ഇരട്ട ജിവപര്യന്തം.

ഏഴാംപ്രതി അമ്പലത്തിന്‍കാല രോഹിണി നിവാസില്‍ അഭിഷേക്, പത്താംപ്രതി അമ്പലത്തിന്‍കാല പ്രശാന്ത് ഭവനില്‍ പ്രശാന്ത്, പന്ത്രണ്ടാംപ്രതി കിഴമച്ചല്‍ ചന്ദ്രവിലാസം വീട്ടില്‍ സജീവ് എന്നിവര്‍ക്കാണ് ജീവപര്യന്തം തടവ്. 2013 മെയ് അഞ്ചിനാണ് സിപിഎം പ്രവര്‍ത്തകനായ അശോകന്‍ കൊല്ലപ്പെട്ടത്. മുഖ്യപ്രതി ശംഭുകുമാര്‍ പലിശയക്ക് പണം നല്‍കിയത് ചോദ്യം ചെയ്തതാണ് കൊലപാതകത്തിലേക്ക് നയിച്ചത്.