കൊല്ലത്ത് ഫര്‍ണീച്ചര്‍ കടയില്‍ തീപ്പിടിത്തം; ലക്ഷങ്ങളുടെ നഷ്ടം

കൊല്ലം: പള്ളിമുക്കില്‍ ഫര്‍ണീച്ചര്‍ കടയ്ക്ക് തീപ്പിടിച്ചു. രാവിലെ ഏഴിനാണ് തീപ്പിടിച്ചത്. സമീപത്തെ ചായക്കടയിലുണ്ടായിരുന്നവരാണ് തീപ്പിടിത്തം ആദ്യം കണ്ടത്. നാട്ടുകാര്‍ അഗ്‌നിരക്ഷാ സേനയേയും ഉടമയേയും വിവരം അറിയിക്കുകയായിരുന്നു.

അഗ്‌നിരക്ഷാ സേനയുടെ മൂന്ന് യൂനിറ്റുകള്‍ ആദ്യമെത്തിയെങ്കിലും തീ നിന്ത്രണവിധേയമായില്ല. തുടര്‍ന്ന് ആറ് യൂനിറ്റുകളെത്തി ഒന്നരമണിക്കൂറോളം പരിശ്രമിച്ചാണ് തീയണച്ചത്. കടയിലെ ഫര്‍ണീച്ചറുകള്‍ മൊത്തം കത്തിനശിച്ച് ലക്ഷങ്ങളുടെ നഷ്ടം സംഭവിച്ചതായാണ് പ്രാഥമിക വിവരം. തീപ്പിടിത്തത്തിന്റെ കാരണം അറിവായിട്ടില്ല.