എട്ട് വയസ്സുകാരിയെ പീഡിപ്പിച്ച മുന്‍ എസ്‌ഐ സര്‍വീസിലിരിക്കെ പോക്‌സോ കേസുകളില്‍ വിദഗ്ധന്‍

കോഴിക്കോട്: എട്ടു വയസ്സുകാരിയെ പീഡിപ്പിച്ച കേസില്‍ അറസ്റ്റിലായ കോഴിക്കോട് ഫറോക്ക് സ്വദേശിയായ റിട്ട.എസ്‌ഐ, സര്‍വീസിലിരിക്കേ പോക്‌സോ കേസുകളുടെ കേസ് ഫയലുകള്‍ കൈകാര്യം ചെയ്യുന്നതില്‍ വിദഗ്ധനായിരുന്നുവെന്ന് സഹപ്രവര്‍ത്തകര്‍. കോഴിക്കോട് സൗത്ത് അസിസ്റ്റന്റ് കമ്മീഷണറുടെ ഓഫിസില്‍ എസ്‌ഐ റാങ്കിലിരിക്കേ വിരമിച്ച ഫറോക്ക് സ്വദേശി ഉണ്ണി ഇന്നലെയാണ് അറസ്റ്റിലായത്. സര്‍വീസിലിരിക്കെ പോക്‌സോ കേസുകളടക്കം ജില്ലയില്‍ രജിസ്റ്റര്‍ ചെയ്ത പ്രധാനപ്പെട്ട കേസുകള്‍ കൈകാര്യം ചെയ്ത ഉദ്യോഗസ്ഥനാണ് ഉണ്ണി. കേസുമായി ബന്ധപ്പെട്ട കോടതിയില്‍ സമര്‍പ്പിക്കേണ്ട റിപ്പോര്‍ട്ടുകള്‍ തയാറാക്കുന്നതിലും ഇയാള്‍ വിദഗ്ധനായിരുന്നുവെന്ന് പോലിസ് ഉദ്യോഗസ്ഥര്‍ വ്യക്തമാക്കുന്നു.

ദിവസങ്ങള്‍ക്ക് മുമ്പാണ് എട്ടുവയസുകാരിയെ ഇയാള്‍ പീഡനത്തിരയാക്കിയത്. പ്രതിയുടെ വീട്ടില്‍വച്ചും വീടിന് സമീപത്തെ ഷെഡില്‍ വച്ചും നിരവധി തവണ ലൈംഗികമായി ഉപദ്രവിച്ചുവെന്ന് ചൈല്‍ഡ് ലൈനിനോടാണ് പെണ്‍കുട്ടി മൊഴി നല്‍കിയത്. തുടര്‍ന്ന് ചൈല്‍ഡ് ലൈന്‍ നല്‍കിയ പരാതിയിലാണ് ഫറോക്ക് പോലിസ് കേസെടുത്ത് പ്രതിയെ അറസ്റ്റ് ചെയ്തത്. മൊഴി രേഖപ്പെടുത്തിയ ശേഷം ഇയാളെ കോടതിയില്‍ ഹാജരാക്കി. കോടതി പ്രതിയെ റിമാന്‍ഡ് ചെയ്തിരിക്കുകയാണ്.