തബ്‌ലീഗ് ജമാഅത്തുകാരെ പിടികൂടുന്നതിന് സമ്മാനം പ്രഖ്യാപിച്ച ഹിന്ദുത്വ നേതാവ് കൊവിഡ് ബാധിച്ച് മരിച്ചു

ലഖ്‌നൗ: തബ്‌ലീഗ് ജമാഅത്തിലെ അംഗങ്ങളെ പിടികൂടുന്നതിനായി 11,000 രൂപ സമ്മാനം പ്രഖ്യാപിച്ച ഹിന്ദു യുവ വാഹിനിയുടെ നേതാവ് 'അജ്ജു ഹിന്ദുസ്ഥാനി' കോവിഡ് -19 ബാധിച്ച് മരിച്ചു. അമ്മയും സഹോദരിയും കൊവിഡ് വന്നു മരിച്ചതിനു പുറകെയാണ് ഹിന്ദു യുവ വാഹിനി നേതാവും രോഗബാധിതനായി മരിച്ചത്.

യോഗി ആദിത്യനാഥ് സ്ഥാപിച്ച തീവ്ര ഹിന്ദുത്വ സംഘടനയായ ഹിന്ദു യുവ വാഹിനി നേതാവായ അജയ് ശ്രീവാസ്തവ് എന്ന അജ്ജു ഹിന്ദുസ്ഥാനി യോഗിയുടെ പ്രിയപ്പെട്ട പ്രവര്‍ത്തകരില്‍ ഒരാളായിരുന്നു. 'യോഗിയുടെ ഹനുമാന്‍' എന്നാണ്‌ അജ്ജുവിനെ വിളിച്ചിരുന്നത്. തബ്‌ലീഗ് ജമാഅത്തുകാരെ പിടിച്ചു കൊണ്ടുവരുന്ന ഏതൊരാള്‍ക്കും ഹിന്ദു യുവ വാഹിനി 11,000 രൂപ സമ്മാനമായി നല്‍കുമെന്ന് അജ്ജു ഹിന്ദുസ്ഥാനി പ്രഖ്യാപിച്ചിരുന്നു.

തബ്‌ലീഗ് ജമാഅത്ത് പ്രവര്‍ത്തകര്‍ കൊവിഡ് പരത്തുകയാണ് എന്ന പ്രചരണത്തിനു മുന്നില്‍ നിന്നയാളാണ് അജ്ജു ഹിന്ദുസ്ഥാനി. തബ്‌ലീഗ് ജമാഅത്തില്‍ പങ്കെടുക്കുന്നവരോ റോഹിംഗ്യന്‍ അഭയാര്‍ഥികളോ ആരായലും മുസ്‌ലിംകള്‍ രാജ്യത്ത് കൊവിഡ് പടര്‍ത്താന്‍ ഗൂഢാലോചന നടത്തുകയാണ് എന്നായിരുന്നു അജ്ജു ഹിന്ദുസ്ഥാനിയുടെ വിഷം വമിക്കുന്ന വാക്കുകള്‍.