സൗദി ദേശീയ ദിനാഘോഷം; സോഷ്യല്‍ ഫോറം മക്ക ബ്ലോക്ക് കമ്മറ്റിയുടെ പ്ലാസ്മ & രക്തദാന ക്യാംപ്

ജിദ്ദ: ഇന്ത്യന്‍ സോഷ്യല്‍ ഫോറം മക്ക ബ്ലോക്ക് കമ്മിറ്റിയുടെ നേതൃത്വത്തില്‍ സൗദി അറേബ്യയുടെ തൊണ്ണൂറ്റി ഒന്നാം ദേശീയ ദിനാഘോഷത്തോന്റെ ഭാഗമായി മക്കയിലെ രണ്ട് പ്രമുഖ ആശുപത്രികളില്‍ സംഘടിപ്പിച്ച രക്തദാന ക്യാംപ് ശ്രദ്ധേയമായി. കിംഗ് ഫൈസല്‍ ഹോസ്പിറ്റല്‍, കിംഗ് അബ്ദുല്‍ അസീസ് ഹോസ്പിറ്റല്‍ എന്നിവിടങ്ങളിലാണ് സോഷ്യല്‍ ഫോറത്തിന്റെ നേതൃത്വത്തില്‍ നിരവധി സന്നദ്ധ സേവകര്‍ രക്തം ദാനം ചെയ്യാനെത്തിയത്. വനിതാ വളണ്ടിയര്‍മാരടക്കം നൂറോളം പേരാണ് ദേശീയ ദിനത്തില്‍ രണ്ട് ആശുപത്രികളിലായി സംഘടിപ്പിച്ച ക്യാംപിലെത്തി രക്തം ദാനം ചെയ്തത്. സോഷ്യല്‍ ഫോറം ബ്ലോക്ക് പ്രസിഡന്റ് മുഹമ്മദ് നിജ ചിറയിന്‍കീഴ്, സെക്രട്ടറി ഷരീഫ് കുഞ്ഞു കോട്ടയം, അബ്ദുസ്സലാം മിര്‍സ, വെല്‍ഫെയര്‍ വിങ് ഭാരവാഹികളായ ജാഫര്‍ പെരിങ്ങാവ്, റാഫി കാനൂര്‍, സാലിഹ് ചങ്ങനാശ്ശേരി തുടങ്ങിയവര്‍ കിംഗ് ഫൈസല്‍ ഹോസ്പിറ്റല്‍, കിംഗ് അബ്ദുല്‍ അസീസ് ഹോസ്പിറ്റല്‍ എന്നിവിടങ്ങളില്‍ ക്യാംപിന് നേതൃത്വം നല്‍കി.