സൗദി: ജോലി സ്ഥലങ്ങളില്‍ ഹസ്തദാനം ഒഴിവാക്കാന്‍ കര്‍ശന നിര്‍ദേശം

റിയാദ് : സ്വകാര്യ, സര്‍ക്കാര്‍ മേഖലാ ജീവനക്കാര്‍ ജോലി സ്ഥലങ്ങളില്‍ പരസ്പരം ഹസ്തദാനം ചെയ്യുന്നത് ഒഴിവാക്കണമെന്ന് മാനവശേഷി, സാമൂഹിക വികസന മന്ത്രാലയം ആവശ്യപ്പെട്ടു. മാസ്‌കുകള്‍ ധരിക്കാന്‍ പ്രത്യേക ശ്രദ്ധ കാണിക്കുകയും ഹസ്തദാനങ്ങള്‍ ഒഴിവാക്കുകയും വേണം. സാധ്യമായത്ര വീഡിയോ കോള്‍ സംവിധാനങ്ങള്‍ ഉപയോഗിച്ച് മീറ്റിംഗുകള്‍ ഡിജിറ്റലാക്കണം. വീടുകളില്‍ ഇരുന്നുള്ള ജോലി കഴിയുന്നത്ര പ്രാവര്‍ത്തികമാക്കുകയും മെച്ചപ്പെട്ട തൊഴില്‍ സമയ നയം നടപ്പാക്കുകയും വേണം.

എല്ലാവരും മുന്‍കരുതല്‍, പ്രതിരോധ നടപടികള്‍ അനിവാര്യമായും പാലിക്കുകയും സാമൂഹിക അകലം ഉറപ്പുവരുത്തുകയും വേണം. ആള്‍ക്കൂട്ടങ്ങളും ഒത്തുചേരലുകളും തടയുന്നതിന് ആവശ്യമായ നടപടികള്‍ സ്വീകരിക്കണം. സേവനങ്ങള്‍ക്ക് ഇലക്‌ട്രോണിക് ചാനലുകള്‍ ഉപയോഗപ്പെടുത്താന്‍ പ്രത്യേകം ശ്രദ്ധ കാണിക്കണമെന്നും ജോലി സ്ഥലങ്ങളില്‍ അണുനശീകരണികള്‍ ലഭ്യമാക്കണമെന്നും മാനവശേഷി, സാമൂഹിക വികസന മന്ത്രാലയം ആവശ്യപ്പെട്ടു.