രാജ്യം സംരക്ഷിക്കേണ്ടവര്‍ തന്നെ പ്രശ്‌നങ്ങള്‍ സൃഷ്ടിക്കുന്നു: ജയാ ബച്ചന്‍

ലഖ്‌നൗ: രാജ്യത്തെ സംരക്ഷിക്കാന്‍ ഉത്തരവാദിത്തപ്പെട്ടവര്‍ തന്നെ ഇവിടെ പ്രശ്‌നങ്ങള്‍ സൃഷ്ടിക്കുകയാണെന്ന് സമാജ് വാദി പാര്‍ട്ടി നേതാവും നടിയുമായ ജയാ ബച്ചന്‍. പൂനം സിന്‍ഹയ്ക്ക് വേണ്ടിയുള്ള പ്രചരണ റാലിയില്‍ സംസാരിക്കവെയാണ് പ്രധാനമന്ത്രി നരേന്ദ്രമോദിക്കെതിരേ അവര്‍ ആഞ്ഞടിച്ചത്.പുതിയ സ്ഥാനാര്‍ഥികളെ ഇരുകയ്യും നീട്ടി സ്വീകരിച്ച പാരമ്പര്യമാണ് സമാജ് വാദി പാര്‍ട്ടിക്കുള്ളതെന്നും അവര്‍ പറഞ്ഞു.

പൂനം സിന്‍ഹയുടെ വിജയം ഉറപ്പാക്കണമെന്നും അല്ലെങ്കില്‍ മുംബൈയില്‍ പോവാന്‍ സാധിക്കില്ലായെന്നും അവര്‍ പറഞ്ഞു. ഇരുവരും 40 വര്‍ഷത്തിലേറെയായി സുഹൃത്തുക്കളാണ്. അഞ്ചാംഘട്ട തിരഞ്ഞെടുപ്പില്‍ മല്‍സരിക്കുന്നവരില്‍ ഏറ്റവും സമ്പന്നരായ സ്ഥാനാര്‍ത്ഥിയാണ് മുന്‍ ബോളിവുഡ് താരം കൂടിയായ പൂനം സിന്‍ഹ. ലഖ്‌നോവില്‍ ആഭ്യന്തര മന്ത്രി രാജ്‌നാഥ്‌സിങ്ങിനെതിരായാണ് പൂനം മല്‍സരിക്കുന്നത്. ബിജെപിയില്‍ നിന്ന് കോണ്‍ഗ്രസിലേക്ക് മാറിയ ശത്രുഘ്‌നന്‍ സിന്‍ഹയുെട ഭാര്യ കൂടീയാണ് പൂനം സിന്‍ഹ.