ഒഡീഷയില്‍ ഫുട്‌ബോള്‍ മല്‍സരത്തിനിടെ മിന്നലേറ്റ് രണ്ടുപേര്‍ മരിച്ചു; 21 പേര്‍ക്ക് പരിക്ക്

ഭുവനേശ്വര്‍: ഒഡീഷയില്‍ പ്രാദേശിക ഫുട്‌ബോള്‍ മല്‍സരത്തിനിടെ മിന്നലേറ്റ് രണ്ടുപേര്‍ മരിച്ചു. ഇതിലൊരാള്‍ ഫുട്‌ബോള്‍ കളിക്കാരനാണ്. 21 പേര്‍ക്ക് പൊള്ളലേറ്റു. സംസ്ഥാന തലസ്ഥാനത്ത് നിന്ന് 350 കിലോമീറ്റര്‍ അകലെ സുന്ദര്‍ഗഡ് ജില്ലയിലെ ബാനീലതയിലായിരുന്നു അപകടം. പരിക്കേറ്റവരിലേറെയും കാണികളാണ്.

ആകാശം മേഘാവൃതമായിരുന്നെങ്കിലും ഇടിമിന്നലുണ്ടായ സമയത്ത് മഴയില്ലായിരുന്നുവെന്നും പോലിസ് പറഞ്ഞു. പരിക്കേറ്റവരില്‍ 17 പേരെ റൂര്‍ക്കേല സര്‍ക്കാര്‍ ആശുപത്രിയിലും ബാക്കി നാലുപേര്‍ ഹതിബാരി സിഎച്ച്‌സിയിലും ചികില്‍സയിലാണെന്ന് പോലിസ് പറഞ്ഞു. അതേസമയം, തെക്കുപടിഞ്ഞാറന്‍ ബംഗാള്‍ ഉള്‍ക്കടലില്‍ ചുഴലിക്കാറ്റിനെ തുടര്‍ന്ന് സംസ്ഥാനത്ത് രണ്ടുദിവസം കൂടി മഴ തുടരുമെന്ന് കേന്ദ്ര കാലാവസ്ഥാ വകുപ്പ് അറിയിച്ചു.