സിഐടിയു ഓഫിസില്‍ യുവാവ് തൂങ്ങി മരിച്ച നിലയില്‍

തൃശൂര്‍: അന്തിക്കാട് സിഐടിയു ഓഫിസില്‍ യുവാവിനെ തൂങ്ങി മരിച്ച നിലയില്‍ കണ്ടെത്തി. കാഞ്ഞാണി വെള്ളേത്തടം സ്വദേശി ലാലപ്പന്‍ എന്നറിയപ്പെടുന്ന സതീഷ് ലാലിനെയാണ് ഞായറാഴ്ച മരിച്ച നിലയില്‍ കണ്ടെത്തിയത്. ഉച്ചയോടെ സതീഷ് പാര്‍ട്ടി ഓഫിസിലെത്തി വെള്ളം കുടിക്കുകയും അവിടെയുണ്ടായിരുന്ന പാര്‍ട്ടി പ്രവര്‍ത്തകരുമായി സംസാരിക്കുകയും ചെയ്തിരുന്നു.

അതിനുശേഷം സമീപത്തെ മുറിയില്‍ കയറി വാതിലടച്ച സതീഷിനെ പുറത്തേക്ക് കാണാതായതോടെ ജനലിലൂടെ നോക്കിയപ്പോഴാണ് മുറിക്കുള്ളില്‍ തൂങ്ങിയ നിലയില്‍ കണ്ടത്. സതീഷിന് വിഷാദരോഗമുണ്ടായിരുന്നതായാണ് വിവരം. മരണത്തില്‍ മറ്റ് അസ്വാഭാവികതകളില്ലെന്ന് പോലിസ് വ്യക്തമാക്കി. ഇന്‍ക്വസ്റ്റ് പൂര്‍ത്തിയാക്കി മൃതദേഹം പോസ്റ്റ്‌മോര്‍ട്ടത്തിനായി ജില്ലാ ആശുപത്രിയിലേക്ക് മാറ്റി.