ആന്ധ്രാപ്രദേശില്‍ കാര്‍ ലോറിയിലിടിച്ച് എട്ട് മരണം

അമരാവതി: ആന്ധ്രാപ്രദേശില്‍ കാര്‍ ലോറിയിലിടിച്ച് എട്ടുപേര്‍ മരിച്ചു. ഒരാള്‍ക്ക് ഗുരുതരമായി പരിക്കേറ്റു. അനന്തപൂര്‍ ജില്ലയിലെ ബുഡഗാവി ഗ്രാമത്തിലാണ് അപകടം നടന്നത്. സംഭവത്തില്‍ പോലിസ് കേസെടുത്തിട്ടുണ്ട്. അമിതവേഗതയിലെത്തിയ കാര്‍ ലോറിയിലിടിക്കുകയായിരുന്നു. അപകടത്തില്‍ എസ്‌യുവി കാറിലുണ്ടായിരുന്ന എട്ടുപേരും സംഭവസ്ഥലത്തുതന്നെ മരിച്ചു.

അപകടത്തില്‍ കാര്‍ പൂര്‍ണമായും തകര്‍ന്നു. ഗുരുതരമായി പരിക്കേറ്റയാളെ ആശുപത്രിയില്‍ പ്രവേശിപ്പിച്ചിരിക്കുകയാണ്. വാര്‍ത്താ ഏജന്‍സിയായ എഎന്‍ഐ റിപോര്‍ട്ട് ചെയ്യുന്നതനുസരിച്ച് എസ്‌യുവിയില്‍ ആകെ ഒമ്പതുപേരാണുണ്ടായിരുന്നത്. അപകടമറിഞ്ഞ് പോലിസ് സ്ഥലത്തെത്തിയാണ് ഗുരുതരമായി പരിക്കേറ്റയാളെ ആശുപത്രിയിലെത്തിച്ചത്. അപകടത്തില്‍ മരിച്ചവരെ തിരിച്ചറിഞ്ഞിട്ടില്ല.