നെഞ്ചുവേദന; മുന്‍ പ്രധാനമന്ത്രി മന്‍മോഹന്‍ സിങ് ഡല്‍ഹി എയിംസില്‍

ന്യൂഡല്‍ഹി: മുന്‍ പ്രധാനമന്ത്രി ഡോ.മന്‍മോഹന്‍ സിങ്ങിനെ നെഞ്ചുവേദനയെത്തുടര്‍ന്ന് ഡല്‍ഹിയിലെ ഓള്‍ ഇന്ത്യ ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സസ് (എയിംസ്) ആശുപത്രിയില്‍ പ്രവേശിപ്പിച്ചു. ഞായറാഴ്ച രാത്രിയോടെയാണ് അദ്ദേഹത്തെ ആശുപത്രിയിലെത്തിച്ചത്. മന്‍മോഹന്‍ സിങ് ഡോക്ടര്‍മാരുടെ നിരീക്ഷണത്തിലാണ്. കാര്‍ഡിയോളജി വിഭാഗം പ്രഫസര്‍ ഡോ. നിതീഷ് നായിക്കിന്റെ മേല്‍നോട്ടത്തിലാണ് ചികില്‍സയെന്ന് പിടിഐ റിപോര്‍ട്ട് ചെയ്തു.

അതേസമയം, മന്‍മോഹന്‍ സിങ്ങിനെ ഐസിയുവില്‍ പ്രവേശിപ്പിച്ചിട്ടില്ലെന്നും സാധാരണ വാര്‍ഡിലാണ് അദ്ദേഹം കഴിയുന്നതെന്നും ദേശീയമാധ്യമങ്ങള്‍ റിപോര്‍ട്ട് ചെയ്തു. കൊവിഡ് ബാധയെത്തുടര്‍ന്ന് പാര്‍ലമെന്റ് സമ്മേളനം മാറ്റിവയ്ക്കുന്നതിന് തൊട്ടുമുമ്പ് അദ്ദേഹം വീണിരുന്നു. തുടര്‍ന്ന്് ഡോക്ടര്‍മാര്‍ മന്‍മോഹന്‍സിങ്ങിന് പൂര്‍ണവിശ്രമം നിര്‍ദേശിക്കുകയും ചെയ്തു. 1990 ലും 2009 ലുമായി രണ്ടുതവണ അദ്ദേഹം ബൈപാസ് സര്‍ജറിയ്ക്ക് വിധേയനായിട്ടുണ്ട്.