റിപ്പോ നിരക്ക് കുറച്ച് ആര്‍ബിഐ; ഭവനവാഹന വായ്പ പലിശ കുറയും

ന്യൂഡല്‍ഹി: റിസര്‍വ് ബാങ്ക് ഓഫ് ഇന്ത്യ (ആര്‍ബിഐ) പ്രധാന വായ്പാ നിരക്ക് അഥവാ റിപ്പോ നിരക്ക് 25 ബേസിസ് പോയിന്റ് കുറച്ചു. ഇതോടെ റിപ്പോ നിരക്ക് ആകെ 6% ആയി കുറഞ്ഞു. ഗവര്‍ണര്‍ സഞ്ജയ് മല്‍ഹോത്രയുടെ നേതൃത്വത്തിലുള്ള സെന്‍ട്രല്‍ ബാങ്കിന്റെ മോണിറ്ററി പോളിസി കമ്മിറ്റി (എംപിസി) ഏപ്രില്‍ 7 ന് ആരംഭിച്ച മൂന്ന് ദിവസത്തെ യോഗത്തിന് പിന്നാലെയാണ് തീരുമാനം. ഫെബ്രുവരിയിലും 25 ബേസിസ് പോയിന്റ് കുറച്ചിരുന്നു. തുടര്‍ച്ചയായ രണ്ടാം തവണയാണ് റിപ്പോ നിരക്ക് കുറയ്ക്കുന്നത്.

കഴിഞ്ഞ മാസങ്ങളില്‍ പണപ്പെരുപ്പത്തില്‍ കുറവുണ്ടായ സാഹചര്യത്തിലാണ് റിസര്‍വ് ബാങ്ക് വായ്പ നിരക്ക് കുറച്ചത്. ഇനി വായ്പ നിക്ഷേപ പലിശ നിരക്ക് കുറയും. ഭവനവാഹന, വ്യക്തിഗത വായ്പ പലിശ നിരക്കും ബാങ്കുകളില്‍ നിന്നും കൂടുതല്‍ പേര്‍ക്ക് വായ്പാ സാകര്യം ലഭിക്കാന്‍ ഇത് സഹായകമാകും. വായ്പയുടെ ചെലവ് കുറച്ച് വളര്‍ച്ചയ്ക്ക് കരുത്തേകുക എന്നതാണ് ആര്‍ബിഐ ലക്ഷ്യമിടുന്നത്.

അതേസമയം, ലിക്വിഡിറ്റി അഡ്ജസ്റ്റ്‌മെന്റ് ഫെസിലിറ്റിക്ക് കീഴിലുള്ള സ്റ്റാന്‍ഡിങ് ഡെപ്പോസിറ്റ് ഫെസിലിറ്റി (എസ്ഡിഎഫ്) നിരക്ക് 5.75% ആയും മാര്‍ജിനല്‍ സ്റ്റാന്‍ഡിങ് ഫെസിലിറ്റി നിരക്ക് (എംഎസ്എഫ് നിരക്ക്) 6.25% ആയും ആര്‍ബിഐ ക്രമീകരിച്ചു.