കെ എം ബഷീറിന്റെ സ്മരണയ്ക്ക് പുരസ്‌കാരം

മലപ്പുറം: സിറാജ് ദിനപത്രം തിരുവനന്തപുരം ബ്യൂറോ ചീഫായിരിക്കെ 2019 ആഗസ്ത് മൂന്നിന് വാഹനാപകടത്തില്‍ കൊല്ലപ്പെട്ട മാധ്യമപ്രവര്‍ത്തകന്‍ കെ എം ബഷീറിന്റെ പേരില്‍ മലപ്പുറം പ്രസ്‌ക്ലബ്ബും തിരൂര്‍ അര്‍ബന്‍ കോ-ഓപറേറ്റീവ് ബാങ്കും ചേര്‍ന്ന് പുരസ്‌കാരം നല്‍കുന്നു. അച്ചടി, ദൃശ്യമാധ്യമങ്ങളിലെ ജനറല്‍ റിപോര്‍ട്ടിങ്ങിന് 25,000 രൂപ വീതവും ഫലകവുമടങ്ങുന്നതാണ് അവാര്‍ഡ്. 2019 ആഗസ്ത് ഒന്നു മുതല്‍ 2020 ആഗസ്ത് 31 വരെ കാലയളവില്‍ മലയാള മാധ്യമങ്ങളില്‍ സംസ്ഥാന തലത്തില്‍ പ്രസിദ്ധീകരിച്ച/സംപ്രേഷണം ചെയ്ത റിപോര്‍ട്ട്/പരമ്പരകളാണ് പരിഗണിക്കുക.

റിപോര്‍ട്ട്/പരമ്പരയുടെ ഒറിജിനലും മൂന്നുകോപ്പിയും അയക്കണം. ദൃശ്യമാധ്യമങ്ങളില്‍ സംപ്രേഷണം ചെയ്തവയുടെ വീഡിയോ ക്ലിപ്പിങ്സ് ഡിവിഡി ഫോര്‍മാറ്റിലാവണം. ഒരാള്‍ ഒരു എന്‍ട്രിയേ അയക്കാവൂ. ബയോഡാറ്റയും ജോലിചെയ്യുന്ന സ്ഥാപനത്തിലെ മേലധികാരിയുടെ സാക്ഷ്യപത്രവും സഹിതം ഒക്ടോബര്‍ 31ന് വൈകുന്നേരം അഞ്ചിന് മുമ്പ് സെക്രട്ടറി, മലപ്പുറം പ്രസ്‌ക്ലബ്, അപ്ഹില്‍, മലപ്പുറം-676505 എന്ന വിലാസത്തില്‍ ലഭിക്കണമെന്ന് പുരസ്‌കാരസമിതി ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു.

ഫോണ്‍: 9961248275, 9447443822. നിലവിലെ സാഹചര്യത്തില്‍ അവാര്‍ഡ് പ്രഖ്യാപനവും വിതരണവും നവംബറില്‍ നടക്കും. ശംസുദ്ദീന്‍ മുബാറക് (പ്രസിഡന്റ്, പ്രസ്‌ക്ലബ് മലപ്പുറം), കെ പി എം റിയാസ് (സെക്രട്ടറി, പ്രസ്‌ക്ലബ് മലപ്പുറം), ഇ ജയന്‍ (ചെയര്‍മാന്‍, തിരൂര്‍ അര്‍ബന്‍ കോ-ഓപറേറ്റീവ് ബാങ്ക്), ശ്രീധരന്‍ (സിഇഒ, തിരൂര്‍ അര്‍ബന്‍ കോ-ഓപറേറ്റീവ് ബാങ്ക്), ദിനേശ് പൂക്കയില്‍ (വൈസ് ചെയര്‍മാന്‍, തിരൂര്‍ അര്‍ബന്‍ കോ-ഓപറേറ്റീവ് ബാങ്ക്), എം ബഷീര്‍ (ഡയറക്ടര്‍, തിരൂര്‍ അര്‍ബന്‍ കോ-ഓപറേറ്റീവ് ബാങ്ക്) എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.