സ്വര്‍ണക്കടത്ത്: മുഖ്യപ്രതികളെ വീണ്ടും ചോദ്യം ചെയ്യാന്‍ കസ്റ്റംസിന് കോടതിയുടെ അനുമതി

കൊച്ചി: ദുബായില്‍ നിന്നും തിരുവനന്തപുരം വിമാനത്താവളം വഴി നയതന്ത്രബാഗിലൂടെ സ്വര്‍ണം കടത്തിയ കേസിലെ മുഖ്യപ്രതികളെ വീണ്ടും ചോദ്യം ചെയ്യാന്‍ കസ്റ്റംസിന് കോടതി അനുമതി നല്‍കി. എറണാകുളത്തെ പ്രത്യേക അഡീഷണല്‍ ചീഫ് ജുഡീഷ്യല്‍ മജിസ്ട്രേറ്റ് കോടതിയാണ് അനുമതി നല്‍കിയത്. കേസിലെ മുഖ്യപ്രതികളായ സ്വപ്‌ന സുരേഷ് , സരിത്,സന്ദീപ് നായര്‍ എന്നിവരെ ജയില്‍ വാര്‍ഡന്റെ സാന്നിധ്യത്തില്‍ ചോദ്യം ചെയ്യാനാണ് കോടതിയുടെ അനുമതി.

പുതുതായി ലഭിച്ച തെളിവുകളുടെ അടിസ്ഥാനത്തില്‍ കേസില്‍ കൂടുതല്‍ പ്രതികളുണ്ടാകാന്‍ സാധ്യതയുണ്ടെന്നും പ്രതികളെ വീണ്ടും ചോദ്യം ചെയ്യേണ്ടത് അനിവാര്യമാണെന്നും അന്വേഷണസംഘം കോടതിയില്‍ ബോധിപ്പിച്ചതിനെ തുടര്‍ന്നാണ് കോടതി അനുമതി നല്‍കിയത്. സ്വപ്‌ന സുരേഷ് അടക്കമുളള പ്രതികളുടെ മൊബൈല്‍ ഫോണില്‍ ലഭിച്ച വിവരങ്ങളുടെ പകര്‍പ്പ് എന്‍ ഐ എ കഴിഞ്ഞ ദിവസം കസ്റ്റംസിന് കൈമാറിയിരുന്നു. ഇതിന്റെ അടിസ്ഥാനത്തില്‍ കൂടിയാണ് ചോദ്യം ചെയ്യലിനു കസ്റ്റംസ് അനുമതി തേടിയത്.