സ്വര്‍ണ്ണക്കടത്തിലെ കള്ളപ്പണക്കേസ്: വിചാരണ കേരളത്തിന് പുറത്തുള്ള കോടതിയിലേക്ക് മാറ്റാന്‍ ഇ ഡി

കൊച്ചി: സ്വര്‍ണ്ണക്കടത്തിലെ കള്ളപ്പണക്കേസിന്റെ വിചാരണ അടക്കമുള്ള നടപടികള്‍ കേരളത്തിനു പുറത്തുള്ള കോടതിയിലേക്ക് മാറ്റാന്‍ ഇ ഡി നീക്കം ആരംഭിച്ചതായി സൂചന.ഇതിനായി ഇ ഡി സുപ്രിം കോടതിയില്‍ ട്രാന്‍സ്ഫര്‍ ഹരജി നല്‍കിയെന്ന റിപോര്‍ട്ടാണ് പുറത്ത് വരുന്നത്.കേസിന്റെ വിചാരണ നടപടികള്‍ എറണാകുളത്തെ പ്രിന്‍സിപ്പല്‍ സെഷന്‍സ് കോടതിയില്‍ തുടങ്ങാനിരിക്കെയാണ് ഇ ഡി യുടെ പുതിയ നീക്കം.

കേസിലെ സാക്ഷികളെ സ്വാധീനിച്ച് കേസ് അട്ടിമറിക്കപ്പെടാന്‍ സാധ്യതയുണ്ടെന്ന ആശങ്കയെ തുടര്‍ന്നാണ് ഇത്തരമൊരു നീക്കത്തിനെ ഇ ഡിയെ പ്രേരിപ്പിച്ചതെന്നാണ് വിവരം.ബംഗളുരുവിലെ കോടതിയിലേക്ക് കേസ് മാറ്റാനാണ് നീക്കമെന്നാണ് പുറത്തു വരുന്ന വിവരം.

കേസിലെ പ്രതിയായ സ്വപ്‌ന സുരേഷ് അടുത്തിടെ നടത്തിയ വെളിപ്പെടുത്തല്‍ ഏറെ ചര്‍ച്ചയായിരുന്നു.മുഖ്യമന്ത്രി അടക്കമുള്ളവരെ പ്രതിക്കൂട്ടിലാക്കിയായായിരുന്നു സ്വപ്‌നയുടെ വെളിപ്പെടുത്തല്‍.കോടതിയില്‍ സ്വപ്‌ന രഹസ്യമൊഴിയും കൊടുത്തിരുന്നു.ഇതിനു പിന്നാലെ സ്വപ്നയെ ഇ ഡി വീണ്ടും വിളിച്ചുവരുത്തി ചോദ്യം ചെയ്തിരുന്നു.