ഷോപ്പിംഗ് മാളിലെത്തിയ യുവനടിയെ അപമാനിക്കാന്‍ ശ്രമിച്ച സംഭവം: പ്രതികളായ യുവാക്കളുടെ ദൃശ്യങ്ങള്‍ പോലിസ് പുറത്തുവിട്ടു

കൊച്ചി: കുടുംബവുമൊത്ത് ഷോപ്പിംഗ് മാളിലെത്തിയ യുവനടിയെ അപമാനിക്കാന്‍ ശ്രമിച്ച പ്രതികളായ യുവാക്കളുടെ സിസിടിവി ദൃശ്യങ്ങള്‍ പോലിസ് പുറത്തുവിട്ടു.മെട്രോ സ്‌റ്റേഷനിലെ ദൃശ്യങ്ങളാണ് പോലിസ് പുറത്തുവിട്ടിരിക്കുന്നത്.മെട്രോയിലാണ് പ്രതികള്‍ രണ്ടു പേരും മാളില്‍ എത്തിയിരിക്കുന്നതും തിരികെ പോയിരിക്കുന്നതും.രണ്ടു പേര്‍ക്കും 25 വയസില്‍ താഴെയാണ് പ്രായമെന്നാണ് പോലിസിന്റെ പ്രാഥമിക വിലയിരുത്തല്‍.മാളില്‍ എത്തിയെങ്കിലും ഇവര്‍ യാതൊന്നും വാങ്ങാതെയാണ് മടങ്ങിയിരിക്കുന്നത്.സെക്യൂരിറ്റി ജീവനക്കാരെ കബളിപ്പിച്ചാണ് ഇവര്‍ മാളില്‍ പ്രവേശിച്ചിരിക്കുന്നത്.

ആള്‍ക്കൂട്ടത്തിനൊപ്പം എത്തിയ ഇവര്‍ മാളിലേക്കുള്ള പ്രവേശന കവാടത്തിലെ സെക്യൂരിറ്റി ജീവനക്കാരെ കബളിപ്പിച്ചാണ് ഉളളില്‍ കടന്നതെന്നാണ് പറയപ്പെടുന്നത്.പ്രവേശന കവാടത്തിലെ രജിസ്റ്ററില്‍ പേരു നല്‍കുകയോ മൊബൈല്‍ നമ്പര്‍ രേഖപെടുത്തുകയോ ചെയ്തിട്ടില്ലെന്നുമാണ് മാളധികൃതര്‍ നടത്തിയ അന്വേഷണത്തില്‍ കണ്ടെത്തിയിരിക്കുന്നത്.മാളില്‍ നിന്നും മടങ്ങിയ ഇവര്‍ എറണാകുളം റെയില്‍വേസ്‌റ്റേഷനിലെത്തി ട്രെയിന്‍ മാര്‍ഗമാണ് ജില്ല വിട്ടിരിക്കുന്നതെന്നാണ് പോലിസിന്റെ നിഗമനം. ഇവര്‍ എറണാകുളം ജില്ലയ്ക്ക് പുറത്തു നിന്നുള്ളവരാണെന്നാണ് പോലിസിന്റെ പ്രാഥമിക വിലയിരുത്തല്‍.നിലവില്‍ പാസഞ്ചാര്‍ തീവണ്ടികള്‍ സര്‍വീസ് നടത്താത്ത സാഹചര്യത്തില്‍ ദീര്‍ഘ ദൂര തീവണ്ടിയിലായിരിക്കും ഇവര്‍ കയറിപോയിരിക്കുന്നതെന്നാണ് വിലയിരുത്തുന്നത്.പ്രതികള്‍ക്കായി പോലിസ് അന്വേഷണം നടത്തിവരികയാണ്.

കുടുംബവുമൊത്ത് ഷോപ്പിംഗ് മാളിലെത്തിയ തന്നെ രണ്ടു ചെറുപ്പക്കാര്‍ അപമാനിക്കാന്‍ ശ്രമിച്ച ശേഷം കടന്നു കളഞ്ഞതായി നടി സമൂഹമാധ്യമം വഴി വെളിപ്പെടുത്തിയതോടെയാണ് ഇത് സംബന്ധിച്ച വിവരം പുറം ലോകം അറിഞ്ഞത്.അപമാനത്തിന്റെ ആഘാതത്തില്‍ ആ സമയത്ത് വേണ്ട വിധത്തില്‍ തനിക്ക് പ്രതികരിക്കാന്‍ കഴിഞ്ഞില്ലെന്നും നടി സമൂഹ മാധ്യമത്തിലൂടെ വെളിപ്പെടുത്തി.നേരിട്ട ദുരനുഭവത്തിന്റെ അനുഭവത്തിന്റെ ആഘാതത്തില്‍ തന്റെ മനസ് ശൂന്യമായി പോയെന്നും നടി സമൂഹ മാധ്യമത്തിലെ പോസ്റ്റില്‍ വ്യക്തമാക്കി. തുടര്‍ന്ന് പോലിസ് മാളിലെത്തി അന്വേഷണം നടത്തുകയും ഇവിടുത്ത സിസിടിവി ദൃശ്യങ്ങള്‍ പരിശോധിച്ച്.നടിയെ അപമാനിക്കാന്‍ ശ്രമിച്ച പ്രതികളായ യുവാക്കളെ തിരിച്ചറിയുകയും ചെയ്തു.ഇതിനു ശേഷം പോലിസ് നടിയുടെ വീട്ടിലെത്തി നടിയുടെ അമ്മയുടെ മൊഴി രേഖപ്പെടുത്തുകയും ചെയ്തു. ഷൂട്ടിംഗ് ലൊക്കേഷനിലായതിനാല്‍ നടിയുടെ മൊഴി രേഖപെടുത്താന്‍ പോലിസിന് കഴിഞ്ഞിട്ടില്ല. നടിയെ അപമാനിച്ച സംഭവത്തില്‍ വനിത കമ്മിഷന്‍ സ്വമേധയാ കേസെടുത്തു.