ചികില്‍സയിലായിരുന്ന എടക്കര സ്വദേശിനി ജിദ്ദയില്‍ മരിച്ചു

ജിദ്ദ: ചികില്‍സയിലായിരുന്ന മലപ്പുറം എടക്കര മുസ്‌ല്യാരങ്ങാടി സ്വദേശിനി നസീമ (43) ജിദ്ദയില്‍ മരിച്ചു. ഒന്നരമാസം മുമ്പ് കൊവിഡ് വന്ന് ഭേദമായിരുന്നു. ഇന്ന് രാവിലെയാണ് മരണം സംഭവിച്ചത്. ഒരുവര്‍ഷം മുമ്പ് കിഡ്‌നി മാറ്റിവയ്ക്കല്‍ നടത്തിയതിനാല്‍ കൊവിഡിനുശേഷവും അസുഖ ബാധിതയായി സുലൈമാനിയ ഈസ്റ്റ് ജിദ്ദ ഹോസ്പിറ്റലില്‍ ചികില്‍സയിലായിരുന്നു.

കഴിഞ്ഞ 20 ദിവസമായി വെന്റിലേറ്ററിലായിരുന്നു. 15 വര്‍ഷത്തോളമായി ജിദ്ദയിലുള്ള നസീമ കിങ് ഫഹദ് ഹോസ്പിറ്റലില്‍ സ്റ്റാഫ് നഴ്‌സായി ജോലിചെയ്യുകയായിരുന്നു. സൗദി എടക്കര വെല്‍ഫെയര്‍ അസോസിയേഷന്‍ ജിദ്ദ പ്രസിഡന്റും എടക്കര മുസ്ല്യാരങ്ങാടിയില്‍ താമസിക്കുന്ന ഹൈദര്‍ ഹാജിയുടെ മകനുമായ ഷാഹിദ് റഹ്മാന്‍ എന്ന നാണിയുടെ ഭാര്യയാണ്. ഏകമകന്‍ യാസീന്‍ 9 വയസ്സ്.