റൊണാള്‍ഡോ റയല്‍ മാഡ്രിഡിലേക്ക് തിരിച്ചെത്തിയേക്കും

മാഡ്രിഡ്: റയല്‍ മാഡ്രിഡ് സൂപ്പര്‍ താരമായിരുന്നു ക്രിസ്റ്റ്യാനോ റൊണാള്‍ഡോ യുവന്റസ് വിട്ട് പഴയ ക്ലബ്ബിലേക്ക് തിരിച്ചെത്തിയേക്കും.സ്പാനിഷ് മാധ്യമമായ എഎസ് ആണ് പുതിയ റിപ്പോര്‍ട്ട് പുറത്ത് വിട്ടത്. ക്രിസ്റ്റിയാനോ യുവന്റസില്‍ സന്തുഷ്ടനല്ലെന്നും ക്ലബ്ബില്‍ തുടരാന്‍ താരത്തിന് താല്‍പ്പര്യമില്ലെന്നും റിപ്പോര്‍ട്ടില്‍ പറയുന്നു. നിലവില്‍ ക്ലബ്ബിനൊപ്പം ഉണ്ടെങ്കിലും ഏത് നിമിഷവും താരം ക്ലബ്ബ് വിട്ടേക്കാം. യുവന്റ്‌സുമായി ശേഷിക്കുന്നത് ഒരു വര്‍ഷത്തെ കരാറാണ്. റൊണാള്‍ഡോയുടെ ആഗ്രഹം ക്ലബ്ബ് വിടാനാണ്. പിഎസ്ജിയാണ് താരത്തിനായി മുന്നിലിറങ്ങിയത്. കിലിയന്‍ എംബാപ്പെ റയല്‍ മാഡ്രിഡിലേക്ക് പോകുന്ന പക്ഷം റോണോ പിഎസ്ജിയില്‍ നിലയുറപ്പിച്ചേക്കും. ഈ ഡീല്‍ നടക്കാത്ത പക്ഷം പോര്‍ച്ചുഗല്‍ താരം റയലിലേക്ക് തിരിച്ചെത്തിയേക്കും. മുന്‍ കോച്ച് കാര്‍ലോ ആന്‍സലോട്ടി റയലിലേക്ക് തിരിച്ചെത്തിയതിനാല്‍ ക്രിസ്റ്റിയാനോയ്ക്ക് ക്ലബ്ബിലേക്ക് മടങ്ങാന്‍ ആഗ്രഹമുണ്ടെന്നും റിപ്പോര്‍ട്ടില്‍ പറയുന്നു.