ചാംപ്യന്‍സ് ലീഗ്; ബയേണിനെ നിലംപരിശാക്കി സിറ്റി; ഇന്ററിനും ജയം

ഇത്തിഹാദ്: ചാംപ്യന്‍സ് ലീഗ് ക്വാര്‍ട്ടര്‍ ഫൈനല്‍ ആദ്യ പാദത്തില്‍ മാഞ്ചസ്റ്റര്‍ സിറ്റി ബയേണ്‍ മ്യുണിക്കിനെ തകര്‍ത്തു. എതിരില്ലാത്ത മൂന്ന് ഗോളിനാണ് സിറ്റിയുടെ ജയം. ഇത്തിഹാദ് സ്‌റ്റേഡിയത്തില്‍ നടന്ന മല്‍സരത്തില്‍ റൊഡ്രി, ബെര്‍ണാഡോ സില്‍വ, ഹാലന്റ് എന്നിവരാണ് സിറ്റിയ്ക്കായി സ്‌കോര്‍ ചെയ്തത്. മറ്റൊരു ക്വാര്‍ട്ടറില്‍ പോര്‍ച്ചുഗല്‍ ക്ലബ്ബ് ബെന്‍ഫിക്കയെ ഇന്റര്‍മിലാന്‍ എതിരില്ലാത്ത രണ്ട് ഗോളിന് പരാജയപ്പെടുത്തി. ബാരെല്ലാ, ലൂക്കാക്കു എന്നിവരാണ് ഇന്ററിന്റെ സ്‌കോറര്‍മാര്‍.ഇന്ന് അര്‍ദ്ധരാത്രി നടക്കുന്ന മല്‍സരങ്ങളില്‍ ചെല്‍സി റയല്‍ മാഡ്രിഡിനെയും എസി മിലാന്‍ നപ്പോളിയെയും നേരിടും.