കോഴിക്കോട് കോര്‍പ്പറേഷന്‍ ഇഎംഎസ് സ്റ്റേഡിയത്തില്‍ ഇന്ന് സൂപ്പര്‍ലീഗ് കേരള ഫൈനല്‍; ഫോഴ്സ കൊച്ചി കാലിക്കറ്റ് എഫ്സിയെ നേരിടും

കോഴിക്കോട്: പ്രഥമ മഹീന്ദ്ര സൂപ്പര്‍ ലീഗ് കേരളയുടെ ഫൈനലില്‍ ഫോഴ്സ കൊച്ചി എഫ് സി ഇന്ന് കാലിക്കറ്റ് എഫ്സിയെ നേരിടും. കോഴിക്കോട് കോര്‍പ്പറേഷന്‍ ഇഎംഎസ് സ്റ്റേഡിയത്തിലാണ് കലാശപ്പോരാട്ടം നടക്കുന്നത്. വൈകീട്ട് 6.30 ന് സമാപനച്ചടങ്ങുകള്‍ ആരംഭിക്കും. രാത്രി എട്ടിനാണ് കിക്കോഫ്.

മത്സരം കാണാന്‍ ഫോഴ്‌സ കൊച്ചി ടീം ഉടമകളായ പൃഥ്വിരാജ്, ഭാര്യ സുപ്രിയ, കാലിക്കറ്റ് എഫ്‌സി ബ്രാന്‍ഡ് അംബാസഡര്‍ ബേസില്‍ ജോസഫ് തുടങ്ങിയവര്‍ എത്തും. വിജയികള്‍ക്ക് കായികമന്ത്രി വി അബ്ദുറഹിമാന്‍ ട്രോഫി സമ്മാനിക്കും. ഐഎസ്എല്‍ മാതൃകയില്‍ സംസ്ഥാനത്ത് ആദ്യമായി നടത്തുന്ന സൂപ്പര്‍ ലീഗ് കേരളയുടെ മത്സരങ്ങള്‍ സെപ്റ്റംബര്‍ ഏഴിനാണ് തുടങ്ങിയത്.

കോഴിക്കോട് നടന്ന ആദ്യ സെമിയില്‍ തിരുവനന്തപുരം കൊമ്പന്‍സിനെ ഒന്നിനെതിരെ രണ്ടു ഗോളുകള്‍ക്ക് തോല്‍പ്പിച്ചാണ് കാലിക്കറ്റ് എഫ് സി ഫൈനലില്‍ എത്തിയത്. രണ്ടാം സെമിയില്‍ കണ്ണൂര്‍ വാരിയേഴ്സിനെ രണ്ടു ഗോളുകള്‍ക്ക് പരാജയപ്പെടുത്തിയാണ് കൊച്ചി എഫ്സി കലാശപോരാട്ടത്തിന് അര്‍ഹത നേടിയത്. ലീഗില്‍ 7 ഗോളുകളുമായി ടോപ് സ്‌കോററാണ് ഫോഴ്‌സ കൊച്ചിയുടെ ബ്രസീലിയന്‍ താരം ഡോറിയല്‍ട്ടണ്‍.