ലോകകപ്പ് യോഗ്യത; ഫ്രഞ്ച് സ്‌ക്വാഡില്‍ നിന്ന് ജിറൗഡ് പുറത്ത്

പാരിസ്: അടുത്ത മാസം ആദ്യം ആരംഭിക്കുന്ന ലോകകപ്പ് ഫുട്‌ബോള്‍ യോഗ്യതാ മല്‍സരങ്ങള്‍ക്കുള്ള ഫ്രഞ്ച് ടീമിനെ പ്രഖ്യാപിച്ചു. പുതുമുഖ താരങ്ങള്‍ക്ക് പ്രധാന്യം നല്‍കിയാണ് ദിദിയര്‍ ദേഷാംസ് 23 അംഗ സ്‌ക്വാഡിനെ പ്രഖ്യാപിച്ചത്. ചെല്‍സിയില്‍ നിന്നും എ സി മിലാനിലേക്ക് ചേക്കേറിയ ഒലിവര്‍ ജിറൗഡിനെ പുറത്തിരുത്തിയാണ് പ്രഖ്യാപനം. 10 വര്‍ഷത്തിനിടെ ആദ്യമായാണ് 35 കാരനായ ജിറൗഡിനെ ടീമില്‍ നിന്നും പുറത്തിരുത്തുന്നത്. മികച്ച ഫോമിലാണെങ്കിലും താരത്തിനെ പരിക്ക് അലട്ടുന്നുവെന്നാണ് കോച്ചിന്റെ വ്യാഖ്യാനം. യൂറോ കപ്പില്‍ കളിച്ച ടീമില്‍ നിന്ന് ജിറൗഡിനെ മാത്രമാണ് പുറത്തിരുത്തിയത്. ബോസ്‌നിയ, ഫിന്‍ലാന്റ്, ഉക്രെയ്ന്‍ എന്നിവര്‍ക്കെതിരേയാണ് ഫ്രാന്‍സിന്റെ മല്‍സരങ്ങള്‍. റാഫേല്‍ വരാനെ, നിക്കോളസ് കാന്റെ, പോള്‍ പോഗ്‌ബെ, കരീം ബെന്‍സിമ, ഗ്രീസ്മാന്‍, അന്റോണി മാര്‍ഷ്യല്‍, കിലിയന്‍ എംബാപ്പെ എന്നിവരെ ടീമില്‍ നിലനിര്‍ത്തിയിട്ടുണ്ട്. ശേഷിക്കുന്നവരില്‍ ഭൂരിഭാഗവും പുതുമുഖ താരങ്ങളാണ്.