കണ്ണൂര്‍ വിമാനത്താവളം വഴി കടത്തിയ ഒരുകിലോ സ്വര്‍ണം പിടികൂടി

കണ്ണൂര്‍: കണ്ണൂര്‍ അന്താരാഷ്ട്ര വിമാനത്താവളം വഴിയെത്തിയ യാത്രക്കാരനില്‍ നിന്ന് ഒരു കിലോയിലേറെ സ്വര്‍ണം പിടികൂടി. കോഴിക്കോട് ഉണ്ണികുളം കാക്കത്തറമ്മല്‍ വീട്ടില്‍ ജംഷീറിനെയാണ് പോലിസ് പിടികൂടിയത്. ദോഹയില്‍ നിന്നെത്തിയ ജംഷീര്‍ വിമാനത്താവളത്തിലെ പരിശോധനയ്ക്ക് ശേഷം പുറത്തിറങ്ങിയതായിരുന്നു. സംശയം തോന്നിയതിനെ തുടര്‍ന്ന് എയര്‍പോര്‍ട്ട് പോലിസും സ്‌ക്വാഡും ചേര്‍ന്ന് മട്ടന്നൂര്‍ കൂത്തുപറമ്പ് റോഡില്‍ നിന്നാണ് പിടികൂടിയത്. പരിശോധനയില്‍ നാല് ക്യാപ്‌സ്യൂള്‍ രൂപത്തിലുള്ള സ്വര്‍ണ മിശ്രിതം കണ്ടെടുത്തു. ഏകദേശം 1123 ഗ്രാം തൂക്കമുണ്ടെന്ന് പോലിസ് അറിയിച്ചു. കണ്ണൂര്‍ സിറ്റി പോലീസ് കമ്മീഷണര്‍ അജിത് കുമാറിന്റെ നേതൃത്വത്തിലാണ് പരിശോധന നടത്തിയത്.