ബിജെപി നേതാക്കളുടെ നബി നിന്ദാ പരാമര്‍ശം: അപലപിച്ച് അഫ്ഗാനിസ്താനും

കാബൂള്‍: ഇന്ത്യ ഭരിക്കുന്ന ബിജെപിയുടെ വക്താക്കള്‍ മുഹമ്മദ് നബിക്കെതിരേ നടത്തിയ പരാമര്‍ശങ്ങളെ അപലപിച്ച് അഫ്ഗാനിസ്താനിലെ താലിബാന്‍ സര്‍ക്കാറും.

ഇന്ത്യയിലെ ഭരണകക്ഷിയുടെ ഒരു ഉദ്യോഗസ്ഥന്‍ ഇസ്‌ലാമിന്റെ പ്രവാചകനെ അപമാനിക്കുന്ന വാക്കുകള്‍ ഉപയോഗിച്ചതിനെ ഇസ്ലാമിക് എമിറേറ്റ് ഓഫ് അഫ്ഗാനിസ്ഥാന്‍ ശക്തമായി അപലപിക്കുന്നതായി താലിബാന്‍ വക്താവ് സബീഹുല്ല മുജാഹിദ് ട്വീറ്റ് ചെയ്തു.ഇസ്ലാം എന്ന വിശുദ്ധ മതത്തെ അപമാനിക്കാനും മുസ്‌ലിംകളുടെ വികാരങ്ങളെ പ്രകോപിപ്പിക്കാനും ഇത്തരം മതഭ്രാന്തന്മാരെ അനുവദിക്കരുതെന്ന് തങ്ങള്‍ ഇന്ത്യന്‍ സര്‍ക്കാരിനോട് അഭ്യര്‍ത്ഥിക്കുന്നതായും അദ്ദേഹം കൂട്ടിച്ചേര്‍ത്തു.

സൗദി അറേബ്യ, ഖത്തര്‍, കുവൈറ്റ്, ഇറാന്‍ എന്നിവ സമാനമായ അപലപനങ്ങള്‍ നടത്തിയതിന് പിന്നാലെ ഇപ്പോള്‍ സസ്‌പെന്‍ഡ് ചെയ്യപ്പെട്ട ബിജെപി വക്താക്കളായ നൂപുര്‍ ശര്‍മ്മയും നവീന്‍ കുമാര്‍ ജിന്‍ഡാലും നടത്തിയ പരാമര്‍ശങ്ങളെ അപലപിക്കുന്ന ഏറ്റവും പുതിയ മുസ്ലീം രാജ്യമായി അഫ്ഗാനിസ്ഥാന്‍ മാറി.

കുവൈറ്റിലെയും ഖത്തറിലെയും ഇന്ത്യന്‍ അംബാസഡര്‍മാരെ ഞായറാഴ്ച വിളിച്ചുവരുത്തി നബിനിന്ദാ പരാമര്‍ശങ്ങളില്‍ പ്രതിഷേധത്തിന്റെ ഔദ്യോഗിക കുറിപ്പുകള്‍ സ്വീകരിക്കാന്‍ ആവശ്യപ്പെട്ടിരുന്നു. ഇന്ത്യന്‍ സര്‍ക്കാര്‍ പരസ്യമായി മാപ്പ് പറയണമെന്നും ദോഹ ആവശ്യപ്പെട്ടിട്ടുണ്ട്.

പ്രവാചകന്‍ മുഹമ്മദ് നബിയെക്കുറിച്ചുള്ള പരാമര്‍ശങ്ങളുടെ പേരില്‍ ശര്‍മ്മയെയും ജിന്‍ഡാലിനെയും ബിജെപി സസ്‌പെന്‍ഡ് ചെയ്യുകയും എല്ലാ മതങ്ങളെയും ബഹുമാനിക്കുക എന്നതാണ് പാര്‍ട്ടിയുടെ നിലപാടെന്ന് വ്യക്തമാക്കുകയും ചെയ്തിരുന്നു.