രണ്ടു ടാങ്കുകള്‍ കൂടി തകര്‍ത്ത് അല്‍ ഖസ്സം ബ്രിഗേഡ്

ഗസ: ഗസയില്‍ അധിനിവേശം നടത്തുന്ന സയണിസ്റ്റ് സൈന്യത്തിന്റെ രണ്ട് ടാങ്കുകള്‍ തകര്‍ത്തെന്ന് അല്‍ ഖസ്സം ബ്രിഗേഡ്. അല്‍ സഹ്‌റ പ്രദേശത്തും സിവില്‍ ഡിഫന്‍സ് സെന്ററിനു സമീപവും വെച്ചാണ് ഓരോ മെര്‍ക്കാവ ടാങ്കുകള്‍ വീതം തകര്‍ത്തത്. അതിശക്തമായ ബോംബാണ് ആക്രമണത്തിന് ഉപയോഗിച്ചത്. അതേസമയം, അല്‍ തവാം പ്രദേശത്ത് ഒരു സയണിസ്റ്റ് സൈനികനെ സ്‌നൈപ്പര്‍ റൈഫിള്‍ ഉപയോഗിച്ച് വെടിവെച്ചിട്ടതായി അല്‍ ഖുദ്‌സ് ബ്രിഗേഡും അറിയിച്ചു.

കഴിഞ്ഞ ദിവസം ജബാലിയ അഭയാര്‍ത്ഥി ക്യാമ്പില്‍ സയണിസ്റ്റുകളുടെ ഒരു കവചിത വാഹനവും അല്‍ ഖസ്സം ബ്രിഗേഡ് തകര്‍ത്തിരുന്നു. കൂടാതെ മറ്റൊരു ആക്രമണത്തില്‍ ഒരു സയണിസ്റ്റ് സൈനികനും കൂടി കൊല്ലപ്പെട്ടു. കൊല്ലപ്പെട്ടയാളുടെ മൃതദേഹം കൊണ്ടു പോവാന്‍ എത്തിയ സൈനിക സംഘത്തിന് നേരെയും ആക്രമണമുണ്ടായി. ഇവര്‍ മൃതദേഹം ഉപേക്ഷിച്ചു രക്ഷപ്പെട്ടു.