യോഗിയുടെ പുതിയ മന്ത്രിമാരില്‍ പകുതിയോളം പേര്‍ക്കെതിരേ ഗുരുതര ക്രിമിനല്‍ കേസുകള്‍

ലഖ്‌നൗ: ഉത്തര്‍പ്രദേശില്‍ യോഗി ആദിത്യനാഥിന്റെ നേതൃത്വത്തിലുള്ള പുതിയ മന്ത്രിസഭയിലെ പകുതിയോളം മന്ത്രിമാര്‍ക്കെതിരേ ഗുരുതര ക്രിമിനല്‍ കേസുകളെന്ന് അസോസിയേഷന്‍ ഓഫ് ഡെമോക്രാറ്റിക് റീഫോംസിന്റെ കണ്ടെത്തല്‍. യോഗി മന്ത്രിസഭയിലെ 20 മന്ത്രിമാര്‍ക്കെതിരായ കുറ്റകൃത്യങ്ങള്‍ ഗുരുതരമാണെന്നാണ് എഡിആറിന്റെ റിപ്പോര്‍ട്ട്. 39 മന്ത്രിമാര്‍ കോടിപതികളാണ്.

ഗുരുതരമായ ക്രിമിനല്‍ കേസുകളുള്ളവരില്‍ മുന്‍ സര്‍ക്കാരില്‍ മന്ത്രി കൂടിയായിരുന്ന നന്ദ് ഗോപാല്‍ ഗുപ്ത നന്ദിയും ഉള്‍പ്പെടുന്നു. കഴിഞ്ഞ സംസ്ഥാന സര്‍ക്കാരിലെ സ്ത്രീ ശാക്തീകരണ മന്ത്രി സ്വാതി സിംഗിന്റെ ഭര്‍ത്താവ് ദയാശങ്കര്‍ സിംഗ് അദ്ദേഹത്തിന് പിന്നാലെയുണ്ട്.

നിയമസഭാ തിരഞ്ഞെടുപ്പില്‍ പരാജയപ്പെട്ട ഉപമുഖ്യമന്ത്രി കേശവ് പ്രസാദ് മൗര്യയ്‌ക്കെതിരെയും നിരവധി കേസുകളുണ്ട്. ക്രിമിനല്‍ ഭീഷണിപ്പെടുത്തല്‍, കൊലപാതകശ്രമം, കുറ്റകരമായ നരഹത്യ, തിരഞ്ഞെടുപ്പിനെ അനാവശ്യമായി സ്വാധീനിക്കാനുള്ള ശ്രമം തുടങ്ങിയ കുറ്റങ്ങള്‍ ഇതില്‍ ഉള്‍പ്പെടുന്നു.

52 മന്ത്രിമാരില്‍ (ആദിത്യനാഥും) ആറ് പേര്‍ ഇരുസഭകളിലും അംഗങ്ങളല്ലാത്തതിനാല്‍ വിശകലനത്തിന്റെ ഭാഗമായിരുന്നില്ല. ഏറ്റവും കൂടുതല്‍ പ്രഖ്യാപിത ആകെ ആസ്തിയുള്ള മന്ത്രി തിലോയ് മണ്ഡലത്തില്‍ നിന്നുള്ള മായങ്കേശ്വര്‍ ശരണ്‍ സിങ്ങാണ്. 58.07 കോടി രൂപ. കൃഷി തന്റെ തൊഴിലായി അദ്ദേഹം പട്ടികപ്പെടുത്തിയിട്ടുണ്ട്. ഏറ്റവും കുറഞ്ഞ ആസ്തിയുള്ളത് ധരംവീര്‍ സിങ്ങാണ് (എംഎല്‍സി) 42.91 ലക്ഷം രൂപ.

ഗൊരഖ്പൂര്‍ അര്‍ബനില്‍ നിന്ന് ആദ്യമായി നിയമസഭാ തിരഞ്ഞെടുപ്പില്‍ വിജയിച്ച മുഖ്യമന്ത്രി ആദിത്യനാഥിന് 1.5 കോടി രൂപ ആസ്തിയും 13 ലക്ഷം രൂപ വരുമാനവുമുണ്ട്. തന്റെ പേരില്‍ ക്രിമിനല്‍ കേസുകളൊന്നുമില്ല. എച്ച്എന്‍ ബഹുഗുണ സര്‍വകലാശാലയില്‍ നിന്ന് (ഉത്തരാഖണ്ഡ്) ശാസ്ത്രത്തില്‍ ബിരുദം നേടിയിട്ടുണ്ട്.