കെ കെ രാഗേഷിന്റെ ഭാര്യയുടെ നിയമനം: 'ശിരസ് ഛേദിച്ച് സര്‍വകലാശാല വളപ്പില്‍ വയ്ക്കും'; കണ്ണൂര്‍ വിസിക്ക് മാവോവാദികളുടെ പേരില്‍ വധഭീഷണി

കണ്ണൂര്‍: കണ്ണൂര്‍ സര്‍വകലാശാല വൈസ് ചാന്‍സലര്‍ പ്രഫ. ഗോപിനാഥ് രവീന്ദ്രന് മാവോവാദികളുടെ പേരില്‍ വധഭീഷണി. മാവോവാദി കബനീദളത്തിന്റെ പേരിലാണ് ഭീഷണിയെത്തിയത്. തപാല്‍വഴിയാണ് വിസിയുടെ ഓഫിസില്‍ ഭീഷണിക്കത്ത് ലഭിച്ചത്.

വൈസ് ചാന്‍സലറുടെ ശിരസ് ഛേദിച്ച് സര്‍വകലാശാല വളപ്പില്‍ വയ്ക്കുമെന്നാണ് കത്തിലുള്ളത്. സിപിഎം നേതാവ് കെ കെ രാഗേഷിന്റെ ഭാര്യ പ്രിയ വര്‍ഗീസിന് നിയമനം നല്‍കുന്നതിനെതിരേയും കത്തില്‍ പരാമര്‍ശമുണ്ട്.

പ്രിയക്ക് വഴിവിട്ട് നിയമനം നല്‍കിയാല്‍ അതിന്റെ പ്രത്യാഘാതം അനുഭവിക്കേണ്ടി വരുമെന്നാണ് കത്തിലെ ഭീഷണി. കണ്ണൂര്‍ സിവില്‍ സ്‌റ്റേഷന്‍ പോസ്റ്റ് ഓഫിസില്‍ നിന്നാണ് കത്ത് പോസ്റ്റ് ചെയ്തിട്ടുള്ളതെന്നാണ് റിപോര്‍ട്ടുകള്‍. പോലിസ് അന്വേഷണം ആരംഭിച്ചു.