പോപ്പുലര്‍ ഫിനാന്‍സിന്റെ സ്ഥാപനങ്ങള്‍ അടച്ചുപൂട്ടാന്‍ ജില്ലാ കലക്ടറുടെ ഉത്തരവ്

പത്തനംതിട്ട: പോപ്പുലര്‍ ഫിനാന്‍സിന്റെ ജില്ലയിലെ സ്ഥാപനങ്ങള്‍ അടച്ചുപൂട്ടാനും സ്വര്‍ണവും മറ്റ് ആസ്ഥികളും അറ്റാച്ച് ചെയ്യാനും ജില്ലാ കലക്ടര്‍ പി ബി നൂഹ് ഉത്തരവിട്ടു. കേരള ഹൈക്കോടതിയുടെയുടെയും സര്‍ക്കാരിന്റെയും നിര്‍ദേശത്തിന്റെ അടിസ്ഥാനത്തിലും 2013 ലെ സാമ്പത്തിക സ്ഥാപന നിയമത്തിലെ സെക്ഷന്‍ നാലു പ്രകാരം നിക്ഷേപകരുടെ താല്‍പര്യ സംരക്ഷണം മുന്‍നിര്‍ത്തിയുമാണ് ഉത്തരവ്. പോപ്പുലര്‍ ഫിനാന്‍സിന്റെ എല്ലാ ശാഖകളും ജില്ലയ്ക്കുള്ളിലെ അനുബന്ധ സ്ഥാപനങ്ങളും അടച്ചുപൂട്ടണമെന്ന് ഉത്തരവില്‍ പറയുന്നു. ധനകാര്യ സ്ഥാപനത്തിന്റെ ശാഖകളിലും മറ്റ് ഓഫിസുകളിലും സൂക്ഷിച്ചിരിക്കുന്ന പണം, സ്വര്‍ണം, മറ്റ് ആസ്തികള്‍ എന്നിവയുള്‍പ്പെടെ എല്ലാ സ്വത്തുക്കളും അറ്റാച്ചുചെയ്യും.

പോപ്പുലര്‍ ഫിനാന്‍സിന്റെ/ കമ്പനിയുടെ ഉടമസ്ഥതയിലുള്ള സ്വത്ത്/കെട്ടിടങ്ങള്‍, ഓഫിസുകള്‍ / വീടുകള്‍, മറ്റേതെങ്കിലും പേരുകളില്‍ അതിന്റെ അനുബന്ധ സ്ഥാപനങ്ങള്‍, അല്ലെങ്കില്‍ ഏതെങ്കിലും അനുബന്ധ നാമം അല്ലെങ്കില്‍ മറ്റേതെങ്കിലും സ്ഥാപനം എന്നിവയില്‍ നിന്ന് ഏതെങ്കിലും സ്വത്തുകള്‍, പണം തുടങ്ങിയവയുടെ കൈമാറ്റം നിരോധിച്ചു. പോപ്പുലര്‍ ഫിനാന്‍സ് അല്ലെങ്കില്‍ അതിന്റെ പങ്കാളികള്‍ / ഏജന്റുമാര്‍ / മാനേജര്‍മാര്‍ ധനകാര്യ സ്ഥാപനങ്ങള്‍ / ബാങ്കുകള്‍ / സഹകരണ സംഘങ്ങള്‍ / ചിട്ടി കമ്പനികള്‍, മറ്റ് എല്ലാ സ്ഥാപനങ്ങള്‍ എന്നിവയിലും പരിപാലിക്കുന്ന എല്ലാ അക്കൗണ്ടുകളും മരവിപ്പിച്ചു.

പോപ്പുലര്‍ ഫിനാന്‍സിന്റെയും അനുബന്ധ സ്ഥാപനങ്ങളുടെയും ഉടമസ്ഥതയിലുള്ളതോ അവരുടെ ഉടമസ്ഥതയിലുള്ളതോ ആയ എല്ലാ കെട്ടിടങ്ങളും / ശാഖകളും / ഓഫിസുകളും മറ്റ് എല്ലാ സ്ഥാപനങ്ങളും അടയ്ക്കാനും പൂട്ടാനും മുദ്രയിടാനും ജില്ലാ കളക്ടര്‍ക്ക് മുന്നില്‍ താക്കോല്‍ ഹാജരാക്കാനും ജില്ലാ പോലിസ് മേധാവിക്ക് നിര്‍ദേശം നല്‍കി. ആവശ്യമെങ്കില്‍ കാവല്‍ ഏര്‍പ്പെടുത്താനും ഉത്തരവില്‍ പറയുന്നു.

ഈ ധനകാര്യ സ്ഥാപനത്തിന്റെ ഉടമസ്ഥതയിലുള്ള ചലിക്കാത്ത വസ്തുക്കളുടെ കൈമാറ്റം, അന്യവല്‍ക്കരണം എന്നിവ നിരോധിക്കുന്നതിന് ആവശ്യമായ എല്ലാ നടപടികളും സ്വീകരിക്കാന്‍ ജില്ലാ രജിസ്ട്രാര്‍ക്ക്് നിര്‍ദേശം നല്‍കി. പോപ്പുലര്‍ ഫിനാന്‍സിന്റെയും അനുബന്ധ സ്ഥാപനങ്ങളുടെയും എല്ലാ അക്കൗണ്ടുകളും മരവിപ്പിക്കുന്നതിന് ആവശ്യമായ നടപടികള്‍ കൈക്കൊള്ളാന്‍ ജില്ലാ ലീഡ് ബാങ്ക് മാനേജര്‍, ജില്ലാ സഹകരണ സംഘങ്ങളുടെ ജോയിന്റ് രജിസ്ട്രാര്‍, റീജ്യനല്‍ മാനേജര്‍ കെഎസ്എഫ്ഇ, ജില്ലാ മാനേജര്‍ കെഎഫ്സി, ജില്ലയിലെ മറ്റ് ധനകാര്യ സ്ഥാപനങ്ങള്‍ എന്നിവരോട് നിര്‍ദേശിച്ചു.

പോപ്പുലര്‍ ഫിനാന്‍സിന്റെ ധനകാര്യ സ്ഥാപനങ്ങളുടെ / അതിന്റെ പങ്കാളികളുടെ / അനുബന്ധ സ്ഥാപനങ്ങളുടെ ഉടമസ്ഥതയിലുള്ള എല്ലാ മോട്ടോര്‍ വാഹനങ്ങളുടെയും വിശദാംശങ്ങള്‍ നല്‍കാനും ലിസ്റ്റ് ചെയ്ത വാഹനങ്ങള്‍ കൈമാറുന്നത് തടയാന്‍ ആവശ്യമായ നടപടികള്‍ സ്വീകരിക്കാനും പത്തനംതിട്ട റീജ്യനല്‍ ട്രാന്‍സ്പോര്‍ട്ട് ഓഫിസര്‍ക്ക് നിര്‍ദേശം നല്‍കി.

പോപ്പുലര്‍ ഫിനാന്‍സിന്റെ ധനകാര്യ സ്ഥാപനങ്ങള്‍ / അതിന്റെ പങ്കാളികള്‍ / അനുബന്ധ സ്ഥാപനങ്ങള്‍ എന്നിവരുടെ ഉടമസ്ഥതയിലുള്ള ചലിക്കാത്ത വസ്തുക്കളുടെ വിശദാംശങ്ങള്‍ നല്‍കാനും സ്വത്തുക്കളുടെ കൈമാറ്റം തടയുന്നതിന് ആവശ്യമായ നടപടികള്‍ കൈക്കൊള്ളാനും ജില്ലയിലെ സബ് ഡിവിഷണല്‍ മജിസ്‌ട്രേറ്റിനും തഹസില്‍ദാര്‍മാര്‍ക്കും നിര്‍ദേശം നല്‍കി. ഈ ഉത്തരവ് അനുസരിച്ച് സ്വീകരിച്ച നടപടികളുടെ റിപോര്‍ട്ട് ആഴ്ചതോറും നല്‍കാനും എല്ലാ നിര്‍ദേശങ്ങളും കര്‍ശനമായി പാലിക്കുന്നുണ്ടെന്ന് ഉറപ്പാക്കാനും ബന്ധപ്പെട്ട ഉദ്യോഗസ്ഥര്‍ക്ക് ജില്ലാ കലക്ടര്‍ നിര്‍ദേശം നല്‍കി.

District Collector's order to close down the institutions of Popular Finance