സൗജന്യ സേവനങ്ങള്‍ വെട്ടിക്കുറച്ചു; എസ്ബിഐയ്‌ക്കെതിരേ പ്രതിഷേധമിരമ്പി

കോഴിക്കോട്: സൗജന്യ സേവനങ്ങള്‍ വെട്ടിച്ചുരുക്കുകയും സേവനങ്ങള്‍ക്ക് നിരക്ക് ഈടാക്കുകയും ചെയ്യുന്ന എസ്ബിഐയുടെ ജനവിരുവിരുദ്ധ നടപടികള്‍ക്കെതിരേ പ്രതിഷേധമിരമ്പി. എസ് ഡിപി ഐ സംസ്ഥാന കമ്മിറ്റിയുടെ ആഹ്വാനപ്രകാരം സംസ്ഥാനവ്യാപകമായി എസ് ബി ഐ ശാഖകള്‍ക്കു മുന്നില്‍ പ്രതിഷേധം സംഘടിപ്പിച്ചു. പാലക്കാട് തൃത്താല എസ്ബിഐ ബ്രാഞ്ചിന് മുമ്പില്‍ മണ്ഡലം പ്രസിഡന്റ് നാസര്‍ തൃത്താല ഉദ്ഘാടനം ചെയ്തു. ബ്രാഞ്ച് പ്രസിഡന്റ് സമന്‍ റഷീദ്, റഷീദ് തച്ചരാംകുന്ന്, മുഹമ്മദ് നേതൃത്വം നല്‍കി. കുമ്പള എസ് ബി ഐ ശാഖയ്ക്കു മുന്നില്‍ നടത്തിയ പ്രതിഷേധത്തിനു എസ്ഡിപിഐ മഞ്ചേശ്വരം മണ്ഡലം കമ്മിറ്റി അംഗം മന്‍സൂര്‍ കുമ്പള, പഞ്ചായത് കമ്മിറ്റി അംഗങ്ങളായ അലി ഷഹാമ, സി എം അശ്‌റഫ് ബംബ്രാണ, സിനാന്‍ കുമ്പള, റംഷാദ് ബദ് രിയ നഗര്‍ എന്നിവര്‍ നേതൃത്വം നല്‍കി.

കൊവിഡ് നിയന്ത്രണങ്ങളുടെ പശ്ചാത്തലത്തില്‍ സാധാരണക്കാര്‍ക്ക് പെന്‍ഷന്‍ ഉള്‍പ്പെടെയുള്ളവ ബാങ്ക് അക്കൗണ്ട് വഴിയായിരിക്കെ അത് എടിഎം വഴി പിന്‍വലിക്കുന്നതിന് നിരക്കും ജിഎസ്ടിയും ഈടാക്കുന്ന നടപടി അങ്ങേയറ്റം മനഷ്യത്വ വിരുദ്ധമാണെന്നും നേതാക്കള്‍ പറഞ്ഞു. മഹാമാരി വിതച്ച ഗുരുതരമായ സാഹചര്യത്തില്‍ ചെറുകിട കച്ചവടക്കാര്‍ പലപ്പോഴും പിടിച്ചുനില്‍ക്കുന്നത് ചെക്കുകള്‍ നല്‍കിയാണ്. ഒരു സാമ്പത്തിക വര്‍ഷത്തില്‍ 10 ചെക്ക് ലീഫ് മാത്രമേ സൗജന്യമായി ഉപയോഗിക്കാന്‍ കഴിയൂ എന്ന നിബന്ധന വ്യാപാര മേഖലയില്‍ കടുത്ത പ്രതിസന്ധി സൃഷ്ടിക്കും. ബാങ്കുകളില്‍ നിന്ന് കോടികള്‍ തട്ടിയെടുത്ത് മുങ്ങി നടക്കുന്ന സഹസ്ര കോടീശ്വരന്‍മാരായ കോര്‍പ്പറേറ്റുകള്‍ക്കെതിരേ ചെറുവിരലനക്കാന്‍ തയ്യാറാവാത്ത എസ്ബിഐ ഉള്‍പ്പെടെയുള്ള സ്ഥാപനങ്ങള്‍ സാധാരണക്കാരെ കൊള്ളയടിക്കാനും പിച്ച ചട്ടിയില്‍ കൈയിട്ടുവാരാനുമാണ് ശ്രമിക്കുന്നത്. സമ്പൂര്‍ണ വിലക്കയറ്റത്തിലൂടെയും വരുമാന നഷ്ടത്തിലൂടെയും നിലയില്ലാക്കയത്തിലായ ജനത നിലനില്‍പ്പിനായി ഇത്തരം ചൂഷണങ്ങള്‍ക്കെതിരേ ശക്തമായ പ്രതിഷേധവുമായി രംഗത്തുവരണമെന്നും എസ് ഡിപി ഐ ആവശ്യപ്പെട്ടു.

Free services cut; SDPI Protests against SBI