ബാഗ്ദാദില്‍ സൈനിക പോസ്റ്റിനു നേരെ വെടിവയ്പ്; 11 പേര്‍ കൊല്ലപ്പെട്ടു

ബാഗ്ദാദ്: പടിഞ്ഞാറന്‍ ബാഗ്ദാദിലെ ഇറാഖി സൈനിക പോസ്റ്റിനു നേരെയുണ്ടായ വെടിവയ്പില്‍ 11 പേര്‍ കൊല്ലപ്പെട്ടു. അജ്ഞാതരായ തോക്കുധാരികള്‍ സ്‌റ്റേറ്റ് സ്‌പോണ്‍സേര്‍ഡ് ട്രൈബല്‍ ഫോഴ്‌സിനു നേരെ നടത്തിയ വെടിവയ്പില്‍ 8 പേര്‍ക്ക് പരിക്കേറ്റതായും പോലിസ് വൃത്തങ്ങള്‍ അറിയിച്ചു. ബാഗ്ദാദ് വിമാനത്താവളത്തിന് സമീപം അല്‍ റാദ്‌വാനിയയില്‍ തമ്പടിച്ചിരുന്ന സൈനികര്‍ക്കു നേരെ ഗ്രനേഡ് എറിയുകയും വെടിയുതിര്‍ക്കുകയും ചെയ്‌തെന്നാണു റോയിട്ടേഴ്‌സ് റിപോര്‍ട്ട് ചെയ്തത്. ഗ്രനേഡുകളും ഓട്ടോമാറ്റിക് ആയുധങ്ങളും ഉപയോഗിച്ച് നാല് വാഹനങ്ങളിലെത്തിയവരാണ് ആക്രമണം നടത്തിയതെന്നും ഇവരെ കണ്ടെത്താന്‍ സൈന്യവും പോലിസും അന്വേഷണം തുടങ്ങിയതായും പോലിസ് വൃത്തങ്ങള്‍ അറിയിച്ചു. ട്രൈബല്‍ ഫോഴ്‌സില്‍ ഉള്‍പ്പെട്ട അഞ്ചുപേരും സുരക്ഷാ സേനയെ സഹായിക്കാനെത്തിയ ആറു പ്രദേശവാസികളും കൊല്ലപ്പെട്ടവരില്‍ ഉള്‍പ്പെട്ടതായി സുരക്ഷാ സേന പറഞ്ഞു. മൃതദേഹങ്ങള്‍ ബാഗ്ദാദിലെ ആശുപത്രിയിലേക്ക് മാറ്റി.

Gunmen kill at least 11 in attack on Iraqi army post in Baghdad