ബസ് കാത്തു നിന്ന പെണ്‍കുട്ടിയെ ശല്യം ചെയ്തു; ചോദ്യം ചെയ്ത വ്യാപാരിക്ക് നാലംഗ സംഘത്തിന്റെ മര്‍ദ്ദനം

മലപ്പുറം: എടപ്പാളില്‍ പെണ്‍കുട്ടിയെ ശല്യം ചെയ്യുന്നത് തടഞ്ഞ് ചോദ്യം ചെയ്ത വ്യാപാരിയായ യുവാവിനെ നാലംഗ സംഘം മര്‍ദിച്ചു. എടപ്പാള്‍ സ്വദേശി ഷബീബിനാണ് മര്‍ദനമേറ്റത്. ഷബീബിനെ മര്‍ദിച്ച പതിനേഴുകരാനടക്കം നാലു പേരെ ചങ്ങരംകുളം പോലിസ് അറസ്റ്റ് ചെയ്തു. പൊന്നാനി സ്വദേശി കല്ലിക്കല്‍ അര്‍ഷാദ്, കുമരനല്ലൂര്‍ സ്വദേശി വിഷ്ണു തുടങ്ങിയവരെയാണ് പോലിസ് പിടികൂടിയത്. ബസ് കാത്ത് നിന്ന വിദ്യാര്‍ഥിയെയാണ് പ്രതികള്‍ ശല്ല്യം ചെയ്തത്. തുടര്‍ന്ന് പെണ്‍കുട്ടി സമീപത്തെ കടയില്‍ പറയുകയായിരുന്നു. പ്രതികളുടെ ചെയ്തിയെ ചോദ്യം ചെയ്ത യുവാവിനെ ഇവര്‍ ക്രൂരമായി മര്‍ദ്ദിക്കുകയായിരുന്നു. പരിക്കേറ്റ ഷബീബ് സമീപത്തെ സ്വകാര്യ ചികില്‍സ തേടി. പോലിസ് കേസെടുത്തു.