സര്‍വകലാശാല വിസിമാര്‍ ഇനി 'കുലഗുരു'; പേരുമാറ്റത്തിന് അംഗീകാരം നല്‍കി മധ്യപ്രദേശ് സര്‍ക്കാര്‍

ഭോപ്പാല്‍: സര്‍വകലാശാലകളിലെ വൈസ് ചാന്‍സലര്‍മാര്‍ ഇനി 'കുലഗുരു' എന്ന പേരില്‍ അറിയപ്പെടും. മധ്യപ്രദേശിലെ ബിജെപി സര്‍ക്കാരാണ് പേരുമാറ്റത്തിന് അംഗീകാരം നല്‍കിയത്. തിങ്കളാഴ്ച ചേര്‍ന്ന മന്ത്രിസഭായോഗമാണ് പേരുമാറ്റം ഐക്യകണ്‌ഠ്യേന അംഗീകരിച്ചത്. ഈ മാസം ഗുരുപൂര്‍ണിമ ആഘോഷിക്കുന്നതിനാല്‍ സര്‍വകലാശാലകളുടെ വൈസ് ചാന്‍സലര്‍മാരെ കുലഗുരു എന്ന് വിശേഷിപ്പിക്കാന്‍ തീരുമാനിച്ചതായും മറ്റ് ചില സംസ്ഥാനങ്ങളും ഈ പേരുമാറ്റത്തില്‍ താല്‍പര്യം പ്രകടിപ്പിച്ച് വിശദാംശങ്ങള്‍ തേടിയതായും മോഹന്‍ യാദവ് പറഞ്ഞു. രാജ്യത്തിന്റെ സംസ്‌കാരത്തെയും ഗുരുകുല സമ്പ്രദായത്തെയും സൂചിപ്പിക്കുന്നതാണ് പേരുമാറ്റമെന്നും അദ്ദേഹം വ്യക്തമാക്കി.