കൊറോണയെ പ്രതിരോധിക്കുന്നില്ല; പതഞ്ജലിയുടെ കൊറോണില്‍ കിറ്റ് വിതരണം നേപ്പാള്‍ നിര്‍ത്തി

കാഠ്മണ്ഡു: കൊറോണ വൈറസിനെ പ്രതിരോധിക്കുമെന്ന് അവകാശപ്പെട്ട് നല്‍കിയ ഉല്‍പ്പന്നങ്ങള്‍ ഫലപ്രദമല്ലെന്ന് കണ്ടെത്തിയതിനാല്‍ യോഗ ഗുരു ബാബാ രാംദേവിന്റെ നിയന്ത്രണത്തിലുള്ള പതഞ്ജലിയുടെ കൊറോണില്‍ കിറ്റുകളുടെ വിതരണം നേപ്പാള്‍ നിര്‍ത്തിവച്ചു. നേപ്പാളിലെ ആയുര്‍വേദ, ബദല്‍ മരുന്നുകളുടെ വകുപ്പാണ് തിങ്കളാഴ്ച രാംദേവിന്റെ പതഞ്ജലി സംഘം സമ്മാനിച്ച കൊറോണില്‍ കിറ്റുകളുടെ വിതരണം നിര്‍ത്തിവച്ചത്. കൊറോണ വൈറസിനെ നേരിടാന്‍ പതഞ്ജലി ഉല്‍പ്പന്നങ്ങള്‍ ഫലപ്രദമാണെന്ന് അവകാശപ്പെട്ട് 1,500 കിറ്റ് കൊറോണില്‍ വാങ്ങുമ്പോള്‍ ശരിയായ നടപടിക്രമങ്ങള്‍ പാലിച്ചില്ലെന്നും ഉത്തരവില്‍ ചൂണ്ടിക്കാട്ടി.

കൊറോണില്‍ കിറ്റിന്റെ ഭാഗമായ ഗുളികകളും മൂക്കില്‍ ഒഴിക്കുന്ന എണ്ണയും കൊറോണ വൈറസിനെ പ്രതിരോധിക്കുന്ന മരുന്നുകള്‍ക്ക് തുല്യമല്ലെന്ന് നേപ്പാള്‍ സര്‍ക്കാരിന്റെ ഏറ്റവും പുതിയ ഉത്തരവ് പറയുന്നു. ഇന്ത്യന്‍ മെഡിക്കല്‍ അസോസിയേഷന്‍(ഐഎംഎ) കൊറോണിലിനെതിരേ ഈയിടെ നടത്തിയ പ്രസ്താവനകള്‍ നേപ്പാള്‍ അധികൃതര്‍ ചൂണ്ടിക്കാട്ടിയിട്ടുണ്ട്. കൊവിഡ് 19 കൈകാര്യം ചെയ്യുന്നതിനായി തന്റെ ഉല്‍പ്പന്നങ്ങളുടെ ഫലപ്രാപ്തി തെളിയിക്കാന്‍ രാംദേവിനെ വെല്ലുവിളിക്കുകയും ചെയ്തു. ഭൂട്ടാന്‍ കഴിഞ്ഞാല്‍ കൊറോണില്‍ കിറ്റുകളുടെ വിതരണം നിര്‍ത്തുന്ന രണ്ടാമത്തെ രാജ്യമാണ് നേപ്പാള്‍. ഭൂട്ടാന്റെ ഡ്രഗ് റെഗുലേറ്ററി അതോറിറ്റി ഇതിനകം രാജ്യത്ത് കൊറോണിലിന്റെ വിതരണം നിര്‍ത്തിവച്ചിരുന്നു.

എന്നിരുന്നാലും, നേപ്പാളില്‍ ഒരു വലിയ ഉല്‍പാദന സൗകര്യവും വിതരണ ശൃംഖലയും പരിപാലിക്കുന്നതിനാല്‍ നേപ്പാള്‍ പതഞ്ജലി ഗ്രൂപ്പുമായി അടുത്ത ബന്ധം പുലര്‍ത്തുന്നുണ്ട്. വിതരണത്തിനുള്ള നിരോധനം പ്രത്യേക ചരക്ക് മാത്രമായി പരിമിതപ്പെടുത്തുമോ അതോ രാജ്യത്തൊട്ടാകെയുള്ള കൊറോണില്‍ കിറ്റുകള്‍ക്കായി വിപുലീകരിക്കുമോ എന്നത് ഇതുവരെ വ്യക്തമല്ല. പ്രമുഖ മഥേസി രാഷ്ട്രീയ കുടുംബങ്ങളെ ഇന്ത്യന്‍ ഗ്രൂപ്പില്‍ നിന്ന് ഒഴിവാക്കാനുള്ള നീക്കമായും ഇതിനെ വ്യാഖ്യാനിക്കപ്പെടുന്നുണ്ട്. മാത്രമല്ല, പുതിയ ഉത്തരവ് നേപ്പാളില്‍ രാഷ്ട്രീയവിവാദത്തിനും തുടക്കമിട്ടിട്ടുണ്ട്.

Nepal stops distribution of Patanjali's Coronil kits