പാലത്തായി ബാലികാ പീഡനക്കേസ്: പ്രതി പത്മരാജനെ ഉടന്‍ അറസ്റ്റുചെയ്യണം- എന്‍ഡബ്ല്യുഎഫ്

കോഴിക്കോട്: കണ്ണൂര്‍ പാലത്തായി പീഡനക്കേസില്‍ ഒമ്പതുവയസുകാരി പീഡിപ്പിക്കപ്പെട്ടെന്ന് ശാസ്ത്രീയ പരിശോധനയിലൂടെ അന്വേഷണസംഘം കണ്ടെത്തിയ സാഹചര്യത്തില്‍ ബിജെപി നേതാവ് പത്മരാജന്റെ ജാമ്യം റദ്ദാക്കി ഉടന്‍ അറസ്റ്റുചെയ്യണമെന്ന് എന്‍ഡബ്ല്യുഎഫ് സംസ്ഥാന ജനറല്‍ സെക്രട്ടറി ടി ഷാഹിന ആവശ്യപ്പെട്ടു. കേസിന്റെ തുടക്കം മുതല്‍തന്നെ ഒമ്പത് വയസ്സുകാരി കളവ് പറയുകയാണെന്ന വ്യാജപ്രചാരണം നടത്തി പ്രതിയെ സംരക്ഷിക്കാനുള്ള ആസൂത്രിതശ്രമമാണ് നടന്നിരുന്നത്.

സാമൂഹികപ്രവര്‍ത്തകരുടെയും എന്‍ഡബ്ല്യുഎഫ് അടക്കമുള്ള മറ്റ് സന്നദ്ധസംഘടനകളുടെയും നിരന്തരപ്രതിഷേധങ്ങള്‍ മൂലം പത്മരാജനെ അറസ്റ്റുചെയ്‌തെങ്കിലും സര്‍ക്കാരിന്റെയും ബിജെപി നേതൃത്വത്തിന്റെയും ഒത്തുകളി മൂലം ജാമ്യം ലഭിക്കുകയായിരുന്നു. പ്രതിയെ സംരക്ഷിക്കാന്‍ ശ്രമിച്ച അന്നത്തെ അന്വേഷണോദ്യോഗസ്ഥന്‍ എസ് ശ്രീജിത്ത് ഉള്‍പ്പെടെയുള്ളവര്‍ക്കെതിരേ നിയമനടപടി സ്വീകരിച്ച് ബാലികയ്ക്കും അവരുടെ കുടുംബത്തിനും നീതി ലഭ്യമാക്കണമെന്നും ടി ഷാഹിന ആവശ്യപ്പെട്ടു.