ഇടുക്കി എംഎല്‍എ റോഷി അഗസ്റ്റിന് കൊവിഡ് സ്ഥിരീകരിച്ചു

ഇടുക്കി: ഇടുക്കി മണ്ഡലം എംഎല്‍എ റോഷി അഗസ്റ്റിന് കൊവിഡ് സ്ഥിരീകരിച്ചു. ഇന്ന് നടത്തിയ കൊവിഡ് പരിശോധനയിലാണ് രോഗം സ്ഥിരീകരിച്ചത്. പോസിറ്റീവ് ആയതോടെ എംഎല്‍എയെ തിരുവനന്തപുരം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.

ഇടുക്കി വാഴത്തോപ്പ് പഞ്ചായത്ത് പ്രസിഡന്റിനും ഇടുക്കി ബ്ലോക്ക് പഞ്ചായത്ത് അംഗത്തിനും കൊവിഡ് സ്ഥിരീകരിച്ചിട്ടുണ്ട്. നേരത്തേ കൊവിഡ് സ്ഥിരീകരിച്ച ജില്ലാ പഞ്ചായത്ത് അംഗത്തിന്റെ സമ്പര്‍ക്കത്തില്‍ നിന്നാണ് ഇരുവര്‍ക്കും രോഗം പകര്‍ന്നത്. എംഎല്‍എ കഴിഞ്ഞ ഒരാഴ്ചയായി തിരുവനന്തപുരത്ത് നിരീക്ഷണത്തില്‍ കഴിയുകയായിരുന്നു.

എംഎല്‍എയുമായി ഇക്കഴിഞ്ഞ 18ആം തിയതി മുതല്‍ നേരിട്ട് സമ്പര്‍ക്കത്തില്‍ വന്നവര്‍ ജാഗ്രത പുലര്‍ത്തണമെന്നും എന്തെങ്കിലും രോഗലക്ഷണം ഉള്ളവര്‍ അടുത്തുള്ള ആശുപത്രിയില്‍ ബന്ധപ്പെടണം എന്നും റോഷി അഗസ്റ്റിന്‍ എംഎല്‍എ ഫേസ്ബുക്കിലൂടെ അറിയിച്ചു.